اعترافات رجل الأعمال المتهم بقتل زوجته مرام أسامة: مكنتش عاوز أموتها.. وضيعت نفسي وضيعتها| خاص
داخل غرفة مغلقة لم يكن يسمع أحد سوى صوتهما المتصاعد في جدال لم يكن الأول بينهما، لحظات من الغضب، لم يدرك فيها الزوج أن قبضته التي كانت تحاول إسكات زوجته مرام أسامة، ستتحول إلى نهاية مأساوية لم يتخيلها، وقف أمام جهات التحقيق شاحب الوجه، يحاول استيعاب الكارثة التي صنعها بيديه، مرددًا بصوت مرتجف: مكنتش عاوزها تموت أنا بس كنت عايزها تسكت.
اعترافات رجل الأعمال المتهم بقتل زوجته مرام أسامة: مكنتش عاوز أموتها
بملامح يكسوها الندم، بدأ الزوج في سرد تفاصيل الساعات الأخيرة قبل أن تتحول مشادة كلامية إلى جريمة، جريمة لم يكن مخططًا لها، لكنها انتهت بجثة هامدة وزوج عاجز عن تصديق أنه أصبح قاتلًا، في الواقعة التي هزت الرأي العام، وتواصل القاهرة 24 نشر نص التحقيقات في القضية التي حملت رقم 12846 لسنة 2024.
وأمام جهات التحقيق قال رجل الأعمال المتهم بقتل زوجته مرام أسامة ضحية العنف الأسري: أنا مكنتش ناوي أوصل للي حصل، ولا كنت متخيل إن اليوم ده هيبقى آخر يوم في حياتها، أنا ومرام كنا متجوزين من سنتين، والحياة بينا كانت ماشية، بس المشاكل كانت بتزيد يوم عن التاني، وهي كانت عنيدة، وأنا عصبي، وكل مرة الخناقات كانت بتوصل لحد الطلاق، لكنها بترجع تهدى، ونكمل.
وأضاف المتهم أمام بقتل زوجته مرام أسامة أمام جهات التحقيق: يوم 2 نوفمبر، بدأت المشكلة من الصبح، لما شفت صورة لها مع صاحبتها دينا كانت لابسة حاجة مش عاجباني، واعترضت، لكن ردها كان مستفز وقالتلي وأنت مالك؟، أنا وقتها حسيت إن مابقاش لي قيمة عندها، وإنها مش بتسمع كلامي، فغليت، ومسكت كباية مية ورشيتها عليها وقلت لها مش هتنزلي.
واستكمل المتهم بقتل زوجته مرام أسامة أمام جهات التحقيق: قامت تصرخ وتزعق في وشي، وأنا عصبيتي زادت أكتر، مسكت إيدها وشديتها لجوة الأوضة وقفلت الباب ورايا، وهي بتقاومني وتقول لي افتح الباب، مش هسكت لك المرة دي، حاولت أهديها، بس كانت صوتها بيعلى، وخوفت الجيران يسمعوا، فجيت عند بقها، وحطيت إيدي علشان تسكت.
وأوضح المتهم قاتل زوجته أمام جهات التحقيق: في اللحظة دي، حسيت إنها بدأت تتخنق، كانت بتقاومني بإيديها، وبتحاول تبعدني عنها، بس أنا كنت متمسك بيها جامد، وبعدها فجأة لقيتها سكتت، ووقعت على السرير وهي بتنهج، وشيلت إيدي بسرعة، وفضلت أنادي عليها، لكنها كانت تعبانة، افتكرت إنها بس متوترة، فقعدت جنبها، وقلت لها أنا آسف، أنا ماكنتش عاوز كده.
وتابع المتهم في اعترافات امام جهات التحقيق: حاولت أهديها، بس كان نفسها مش منتظم، وعيونها مبرقة، واستنيت شوية، وبعدها شلتها ونزلت بيها المستشفى، وقلت لهم إنها تعبانة ومش قادرة تتنفس، قعدوا يعالجوها، وبعد كام يوم قالولي إنها ماتت ساعتها حسيت إن الدنيا سودة قدامي، ومش قادر أفهم إزاي ده حصل.
واختتم المتهم كلامه أمام جهات التحقيق: مكنتش عاوزها تموت، أقسم بالله ما كنت قاصد أقتلها كل اللي حصل غصب عني، وماخدتش بالي إن ضغطي عليها بالطريقة دي ممكن يوديها، ولما البوليس جالي، ماقدرتش أهرب، كنت عارف إن النهاية قربت، وعرفت إني ضيعت نفسي وضيعتها.
وفي وقت سابق قررت محكمة جنايات القاهرة المنعقدة بالتجمع الخامس، تأجيل أولى جلسات محاكمة رجل الأعمال المتهم بإنهاء حياة زوجته مرام أسامة في منطقة التجمع الخامس، لـ الأسبوع الثالث من دور شهر أبريل المقبل.
