والدة مرام أسامة ضحية زوجها رجل الأعمال في التحقيقات: ضغط على رقبتها وقطع لها البلعوم| خاص
يواصل القاهرة 24 نشر التحقيقات في القضية التي حملت رقم 12846 لسنة 2024 والمعروفة إعلاميا بـ مقتل مرام أسامة، والتي بدأت بنشوب خلاف بين المجني عليها وزجها رجل الأعمال المتهم بالاعتداء عليها بالضرب داخل مسكنهما في التجمع الخامس، ما أدى إلى تعرض المجني عليها لإصابات بالغة في الرقبة والبلعوم، ورفض الزوج نقلها إلى المستشفى لتلقيها العلاج، ما أدى إلى تعرضها لـ مضاعفات صحية خطيرة، وحبسها الزوج في المنزل لمدة 5 أيام، وحين جرى نقلها إلى المستشفى فشل الأطباء في علاجها، وتوفيت، تاركة خلفها طفلتين.
قالت نوال.ا والدة مرام أسامة أمام جهات التحقيق: اللي حصل أني عايشة أنا ووالد مرام في كندا ومرام كلمتني أنا ووالدها بتاريخ 2-11-2024 وقالتلي إن زوجها ضربها وأنها حاسة بألم في جسمها وصدرها وزورها ومش قادرة تتكلم، وقالتلي إن دا بسبب خناقة حصلت بينها وبين زوجها بس مقالتليش اللي حصل بالضبط في الخنافة.
تحقيقات مرام أسامة ضحية زوجها رجل الأعمال
وأضافت والدة مرام ضحية زوجها رجل الأعمال بالتجمع الخامس: وقالت إنها عايزة تروح تعمل محضر وأنا قولتلها بلاش وهدي الدنيا بينك وبين زوجك، وأنا وباباكي قربنا نيجي من السفر ولما نيجي تبقى نشوف المشكلة اللي حصلت ما بينكم ونحلها، بس ساعتها مكنتش أعرف ضربها ازاي ولا عمل فيها ايه لأنه لما أنا سألت معتز قالي مقليش اللي حصل بالضبط.
واستكملت والدة مرام أسامة في التحقيقات: من ساعتها مكلمتهاش وافتكرت أن الأمور بينهم بقت كويسة فمكلمتهاش تاني، وفي يوم 2024/11/1 اتصلنا بيها مردتش وكلمنا أنا ووالدها معتز زوج بنتي، وقالي إنها في مستشفى نسائم وهياخدها مستشفى السعودي الألماني، ولما سألناه فيه أيه في المستشفى قال إن عندها صديد في اللوز وأنه أخدها علشان يعملها فحوصات.
وواصلت: وقالي ساعتها إن الحالة مستقرة ومكنش عايز يقولنا في الأول هي في مستشفى ايه وهو كان عمال يقول إنها مش مستاهلة وعندها حاجة بسيطة، لحد ما والدها اللي هو زوجي شد عليه في التليفون وقاله إنه هيبعتله أخوها يطمن عليها فقاله على مكان المستشفى، ولما نزلت من كندا كانت هي في مستشفى السعودي الألماني وحالتها صعبة، وببقت تبصلنا بس متتكلمش معانا وكان عندها كدمات في ايدها الاثنين وكان باين عليها التعب، والدكاترة قالوا أن عندها قطع بالبلعوم، وعملولها كذا عملية وقالوا بعد العملية أن القطع كان كبير، وبعدين حالتها الصحية تدهورت، وتوفت إلى يوم 3 نوفمبر 2024 وأنا في المستشفى مشوفتش زوجها خالص بس دينا صاحبتها كانت موجودة وقالتلي إنها نزلت مع مرام يوم ما زوجها ضربها يوم 2-11-2024 اللي هي كلمتني فيه وقابلتها هي وواحدة صاحبتهم ثانية وراحت تاخذها من المستشفى علشان تقعد معاها لحد ما تحل مشكلتها.
وأردفت والدة مرام: صاحبتها دينا قالت لي إن مرام مكنش معاها بطاقة ومعرفتش تعمل محضر وراحت الشقة في نفس اليوم عشان تاخد الملابس بتاعتها علشان تروح تقعد مع دينا صاحبتها بس زوجها ساعتها منعها من الخروج، وقالت لي إن مرام حكتلها أن زوجها خنقها وضغط على رقبتها بجسمه وقالتلي إن كان فيها إصابات وهي صورتها يومها.
