اعترافات رجل الأعمال المتهم بقتل زوجته مرام أسامة بالتجمع: قالتلي خنتك مع طليقي وأنت مش راجل| انفراد
أثارت واقعة مقتل مرام أسامة العماوي، والتي بدأت بنشوب خلاف بين المجنى عليها وزجها رجل الأعمال المتهم بالتعدي عليها بالضرب داخل مسكنهما في التجمع الخامس، مما أدى إلى تعرض المجني عليها لإصابات بالغة في الرقبة والبلعوم، ورفض الزوج نقلها إلى المستشفى لتلقيها العلاج، ما أدى إلى تعرضها لـ مضاعفات صحية خطيرة، وحبسها الزوج في المنزل لمدة 5 أيام، وحين تم نقلها إلى المستشفى فشل الأطباء في علاجها، وتوفيت، تاركة خلفها طفلتين.
اعترافات رجل الأعمال قاتل زوجته مرام أسامة بالتجمع
وينفرد القاهرة 24 بنشر التحقيقات في القضية التي حملت رقم 12846 لسنة 2024 التي كشفت تبليغ أحد المستشفيات بوجود حالة وفاة باسم مرام أسامة، إذ عند دخولها المستشفى بتاريخ 2024/11/10 بعد ادعاء عائلة المريضة إصابتها بالوجه والعين، وكانت المريضة تعاني من التهابات رؤية حادة وتجمع صديدي بالبلوري وفشل تنفس حاد، وبالانتقال إلى المستشفى تبين أن المتوفاة مرام أسامة في العقد الثالث من العمر، موضوع شاش بالعنق من الأمام يصل طوله إلى 168 سنتي مترا، مع وجود شاش بالقصبة الهوائية وأثر وجود عملية جراحية لكسر في القصبة الهوائية.
وأمام جهات التحقيق وقف معتز سامي رجل الأعمال المتهم بقتل زوجته مرام عن تعديه على المجني عليها ضربًا مستقرة تلك الضربات بحلقها، مسفرة عن الإصابات الموصوفة بالتقرير الطبي المرفق.
المتهم خلال التحقيقات: أنا ضربتها بالقلم بس على وشها ومعملتلهاش حاجة تاني
وقال المتهم خلال التحقيقات: أنا ضربتها بالقلم بس على وشها ومعملتلهاش حاجة تاني؟! واللي حصل أني كنت متجوز من واحدة اسمها نورهان روني سنة 2012 وخلفت منها ابني آدم وفضل الزواج مستمر ما بينا لحد سنة 2019، كانت هي جات طلبت مني الطلاق وفضلت أحاول معاها عشان أفهم هي عايزة تطلق ليه؟
وأوضح رجل الأعمال المتهم: وابتديت أراقبها لحد كشفتني؛ فطلعت تجري وحصل ما بينا مطاردة، ولما رجعت البيت كلمت أهلها وأخوها جه على البيت، ولما وجهوها اعترفت إنها بتخوني وأخوها فضل يضرب فيها وأنا ساعتها مضربتهاش؛ لأن أخوها ضربها جامد، ووصلت لدرجة إني كنت بحوشه عنها، وبعدين اتفاقنا إننا نطلق وآدم ابني يعيش معايا وطلقتها واديتها كل حقوقها.
وأردف المتهم أمام جهات التحقيق: وبعدين كنت في الفترة الأخيرة عايش مع ابني بجانب الشغل بتاعي فمكنتش بعرف أهتم بيه كويس، فاتعرفت على مرام على تطبيق اسمه bumble على النت وقعدنا تتكلم على التطبيق، لحد ما ابتدينا ننزل مع بعض ونقرب وفضلنا كدا حوالي ست شهور، حكتلي مرام إنها كانت متجوزة من واحد ومخلفة منه بنتين، وإن سبب الطلاق ما بينهم كان علشان بيخونها وكان بيبعت صورها الخاصة لرجالة وإنه مدمن مخدرات.
رجل الأعمال المتهم بقتل زوجته يروي تفاصيل عنها
وأضاف المتهم بقتل زوجته: وبعدين إحنا قررنا إننا نتجوز، واتجوزنا فعلا في 2023/12/15 وأخدت بيت في التجمع شقة دوبلكس عشان يكفينا أنا وآدم ومرام، وبناتها الاتنين جم عشان يعيشوا معانا، ومن ساعة ما اتجوزنا واحنا قاعدين في البيت ده وكانت علاقتنا طبيعية.
وأكمل المتهم: بس اكتشفت إن مرام عصبية جدا!! وكانت بتتعصب كتير ولأتفه الأسباب وكان بيحصل ما بينا خلافات زوجية كتيره بسبب ده، وهي قالتلي إن عندها اضطراب الشخصية الحديدية، ومعناه إنه الشخص دا بيبالغ في ردود أفعاله ومبيقدرش يتحكم في مشاعره وممكن يبقى عنيف.
وتابع: وهي كانت بتشتغل مُدرسة في مدرسة في التجمع، وبعدين في الفترة الأخيرة كانت الدنيا طبيعية ما بينا ومعقولة، وحتى كان عيد ميلادها يوم 25-10-2024، وأنا كنت هسافر السعودية في شغل يوم 2025/10/19 فاحتفلنا بعيد ميلادها قبل ما أسافر وجبنا كيك في البيت والولاد احتفلوا بيها، وبعدين أنا سافرت ورجعت تقريبا يوم 26-10-2024، وجبتلها هدايا والدنيا بينا كانت لذيذة.
واستطرد: وفي يوم 27-10-2024 مرام كان زورها واجعها جدا، وصوتها رايح، وده كان أول مرة يحصلها، وافتكرته دور برد عادي، وهي قالتلي بعد كده إنها محتاجة قطرة مضاد حيوي للأذن؛ عشان الالتهاب يخف.
رجل الأعمال المتهم بقتل زوجته: أتأخرت عليها قالتلي مش هنروح عند الدكتور
وأشار المتهم: اتفقنا إننا تاني يوم هنروح للدكتور بعد ما أرجع من الشغل وكان معادي حوالي الساعة 8 مساء، بس أتأخرت بسبب الطريق كان زحمة، وحاولت اتصل بيها وأفهماها بس هي مكنتش بترد عليا لحد ما وصلت البيت؛ طلعت لقيتها مضايقة إني أتأخرت عليها وقولتها يلا علشان نروح الطوارئ فهي قالتلي لا مش هنروح وأصرّت إنها متنزلش.
ونوه: وتاني يوم الدنيا بدأت تظبط تاني وكانت مرام هديت واتعاملنا عادي لحد بوم 31-10-2024 وفي اليوم دا روحنا سهرنا في ديسكو في زايد هي كانت حاجزة حفلة هناك وكان معانا ساعتها مخدر اسمه MD، كانت مرام واخداه من واحدة صاحبتها وشربناه واحنا رايحين الحفلة في العربية، وهو كان عبارة عن بودر بيتحط على الخمرة فحطينا بودر على الكحول وشربناه، وبعدين لما دخلنا كايرو جاز شربنا خمرة ثاني وكانت الدنيا تمام.
وأضاف الزوج المتهم بقتل زوجته: تاني يوم الجمعة 1-11-2024 بليل مرام قالتلي إن عيد ميلاد صاحبتها دينا النهردة، وإن الصور اللي عندها على الموبيل اتمسحت، فطلبت من مراتي ابعتلها صورة ليها هي ودينا علشان تنزلها استوري في عيد ميلادها وأنا ساعتها طلعتلها من على الموبيلي، وهي قالتلي لا ابعتلي أي صورة وخلاص بس بأسلوب وحش.
وأكمل رجل الأعمال: فأنا عشان اتلاشى الخناقة نقيت أحلى 3 صور وبعتهلها على الوتساب، وبعدين مرام فضلت تقل أدبها عليا وتقولي أنت مبتفهمش وقولتلك أنا عايزة صورة واحدة، قمت ساعتها قولتلها تمام أنا مش عايز اتخانق؛ فأخدت المخدة ونمت برا في الليفنج.
واستطرد: وتاني يوم مرام بعتتلي على الواتساب وأنا نايم في الليفنح على الكنبة، وقالتلي إن السخان مش شغال، فرديت عليها وقولتها اللي هجيب حد الساعة 10 عشان يصلح!! فمعجبهاش الكلام وقالت حاجة مش فاكرها، وأنا كملت نوم وبعدين هي طلبت أكل على أساس إننا نفطر مع بعض، وطلعت الولاد زينة وزهرة وآدم في أوضة النوم فوق؛ عشان تاكل معهم.
وقال الزوج المتهم: وبعدين بعتلي آدم على الليفنج عشان يصحيني لأني كنت نايم وقالي مرام عايزاك، وبعد كده بدأت اكلمها من مكاني وهي كانت بتناديني، وأنا قولتلها إني تعبان مش هاكل دلوقتي، أنا عايز أنام ولما يجي ميعاد العيد ميلاد الساعة 12 أنا هنزل معاكي؛ فلقيتها فجأة نزلت الولاد كلهم في الدور اللي تحت وقفلت باب الليفنج وجت تتخانق معايا وتزعق وتقولي بلاش الطريقة اللي أنت بتتكلم بيها ديه.
المتهم بقتل مرام أسامة: اتهجمت عليا علشان مقومتش كلت معاها
وزعم: اتهجمت عليا وزعقت وكل ده علشان مقومتش كلت معاها، كلت معاهم وقولتها الكلام اللي أنا قولته، بس بدأت تضربني وأنا نايم على الكنبة بأيديها على كتفي، فبدأت أقوم عشان هي متعورنيش ففضلت ساكت بعد ما قومت وحطيت إيدي ورا ضهري علشان هي تهدى، وهي فضلت تزعق وتقول طلقني وبطل البرود وشتمتي شتيمة قذرة.
وأشار المتهم: ابتدت تضربني وكنا واقفين في وش بعض، وهي شمرت درعتها وقالتلي حلو أوي البروزز دي، اللي هي الكدمات التي ظهرت في إيديها لما كانت بتضربني، وأنا بحوش وبدافع عن نفسي وساعتها هي نادت لبناتها وقالتلهم كلموا باباكوا عشان ياخدكم!!
المتهم بقتل زوجته: قالتلي أعلى ما في خيلك اركبوا، واخبط راسك في الحيط وطلقني
وأردف: وبعد كده هي دخلت الأوضة وأنا فضلت في الليفنج، وبعدها بشوية لقيتها خارجة من الأوضة وهي لابسة والمفروض إننا كنا نازلين مع بعض العيد ميلاد، فأنا قولتلها هو مش احنا المفروض نازلين مع بعض فقالتلي لا؟! هو بنات بس وهي كانت لابسة جيبة قصيرة فقولتلها مش هتنزلي كده بالمنظر ده غير وأنا معاكي وتبقي لابسة بالطو أو حاجة تغطيكي، فهي قالتلي لا أنا هنزل وأعلى ما في خيلك اركبوا، واخبط راسك في الحيط وطلقني.
واستطرد المتهم: بدأت تستفزني فكان في إيدي زجاجة مياه فقومت راشش المياه على لبسها؛ هي طبعا أتجننت عشان لبسها اتبهدل، وقعدت تشتمني وقولتلها ادخلي جوا الأوضة وهي مكنتش عايزة تدخل؛ فشديتها من إيديها، وهي كانت بتقاوم لحد ما دخلتها الأوضة، وراحت عند لبسي وكانت بتجيبه من الدولاب وترميه وبعدين هي كلمت مامتها وقالتلها قولي لبابا إني عايزة أطلق، وبعدين باباها دخل في الموضوع وقعد يسمع اللي هي بتقوله وقالي اطلع برا بالموبيل عشان يسمعني وتعرف تتكلم فبدأت أشرحله القصة والمشاكل اللي حصلت.
وأضاف: وفضلت تصرخ وكانت متعصبة، فقفل المكالمة وقالها أنا برا الموضوع ده، وساعتها هي قعدت تعاتبني، وقولتلها إني بشرح لأهلك اللي حصل عشان ميقولوش عليكي مجنونة، والدنيا هديت بعد كدا كان جالهم السواق ومشيوا، فهي دخلت وظبطت لبسها تاني، وطلعتلي بتقولي أنا هنزل، فقولتلها يا مرام مش هتنزلي؟ فقالتلي أنا المفروض أجيب الكيك فقولتلها يعني اللي فارق معاكي الكيك، فهي قالتلي أبوك، والكيك أهم منك.
المتهم زاعمًا: قالتلي إنها نامت مع طلقها وهي على ذمتي
واختتم رجل الأعمال المتهم بقتل زوجته مرام أسامة: وايتدا الموضوع يشد تاني ما بينا وبدأت تزعق وتقل أدبها وكان في عُمال شغالين في العمارة؛ فأنا خفت إنهم يسمعوا زعيقها، وآدم كمان كان موجود فشديتها عشان أدخلها الأوضة، وفضلت تشتم فيا وقالتلي علشان كده مراتك الأولانية خانتك، وقالتلي بقولك إيه أنا نمت مع حسام طليقي وأنا على ذمتك؛ فضربتها بالقلم على وشها.
