المتهم بقتل زوجته في أسيوط: كنت شاري السلاح ومجهّزه عشان حاسس بخيانتها
كشفت التحقيقات في القضية التي حملت رقم 150 لسنة 2025، والمتهم فيها أحد الأشخاص بقتل زوجته وتدعى ش. ع مع سبق الإصرار والترصد بأبنوب في محافظة أسيوط، أن المتهم بيت النية وعقد العزم على قتلها، وأعد لذلك سلاحا ناريا، وتوجه إلى حجرتها، وما أن ظفر بها حتى أطلق صوبها عيارا ناريا بفرد خرطوش، فأحدث ما بها من إصابات والتي أودت بحياتها.
أقوال المتهم بقتل زوجته في أسيوط أمام جهات التحقيق
وأمام جهات التحقيق قال المتهم بقتل زوجته: يوم الجمعة اللي فات كنت موجود في شقتي ونمت حوالي الساعة 4 العصر، وصحيت من النوم حوالي الساعة 9 ونص مساء، وشربت شاي وسجاير وأكلت وقعدت شوية ونمت تاني على الساعة 12 صباحا من صباح يوم السبت، وصحيت بعدها بساعتين على صوت باب البلكونة اللي في الصالة بيتقفل، وبصيت فوق على سطح البيت بس ملحقتش أشوف حد، وبعدها رجعت أوضتي تاني.
وأضاف المتهم بقتل زوجته: قعدت أفكر إن مراتي بتخوني، عشان أنا كنت بشك فيها من فترة، وقعدت أقول مين اللي بييجي يدخل عندى شقتي، وأنا أصلا كان بقالي فترة شاكك في سلوكها، وكنت بعتقد إنها بتخوني، وإن فيه حد بييجي عندها الشقة وأنا مش موجود، وقعدت أفكر حوالي تلت ساعة في كل تصرفات زوجتي اللي فاتت وسلوكها.
وتابع: كان معايا سلاح ناري فرد خرطوش شايله فوق دولاب أوضة النوم بتاعتي، جايبه من زمان، وكنت شايله عشان حاسس إن مراتی بتخوني، وكنت مستني أمسكها متلبسة عشان استخدمه، والسلاح ده كان فيها طلقة، وكنت راكن طلقة تانية بره السلاح.
وأكمل المتهم بقتل زوجته: جبت السلاح وقعدت أفكر تاني في تصرفاتها وسلوكياتها اللي بقالها فترة بتثير فيا الشك والريبة إنها بتخوني، ودخلت الأوضة اللي هي نايمة فيها مع العيال، ورحت ضربتها طلقة في جنبها الشمال وهي نايمة، فصرخت، وبنتي يارا اللي كانت نايمة جنبها صحيت وصرخت، فجريت وهربت من البيت.
