أول تعليق من عامل الدليفري المفصول بسبب كلمة العفو: الشركة تطالبني بوصل أمانة
زعم شهاب أبو سلامة البالغ من العمر 26 عاما، أنه تعرض للظلم والتهديد من شركة شهيرة كان يعمل بها سائق دليفري، بعد إدلاء أحد العملاء بشكوى ضده.
أول تعليق من عامل الدليفري فصل من العمل بسبب كلمة العفو
وقال شهاب أبو سلامة لـ القاهرة 24: أنا شغال دليفري من شهر في إحدى الشركات، مش أول مرة أوصل أوردر للعميل دا، روحت له قبل كدا بأوردر ومكنتش عارف مكان الشقة وكلمته عشان أوصله، لما سلمته الأوردر رد عليا وقالي: ماهي سهلة أهي.
وأضاف شهاب، روحت له مرة كمان وكنت عارف المكان سلمته الأوردر، وقالي شكرا رديت عليه قولت له العفو، فضل باصص عليا لحد ما نزلت ركبت الموتوسيكل، وبعدين لقيته بيبص عليا تاني من شباك المطبخ.
وأوضح: بعد ما خلصت اليوم، لقيت المشرف علينا بيكمني وقالي هات الفلوس اللي معاك هزرت معاه قولت له هتمشيني ولا أيه قالي: تعالي عايزك، سألني لو حصل حاجة النهاردة مع أي عميل قولت له محصلش حاجة.
وأردف: مر حوالي 3 أيام وأنا شغال عادي، وبعدين لقيتهم بيقولولي عندك تحقيق في مقر الشركة بسبب إن العميل ده قدم فيا شكوى، لما روحت الشركة كان مضمون الشركة أن أنا كنت قريب منه جدا وأنا بسلم الأوردر ولما قالي شكرا، ماقولتش العفو بشكل لائق.
وأشار: الأتش أر قالي أمضي إخلاء طرف، وقولت له التحقيق كان ظالم وأنا هكتب على السوشيال ميديا الظلم اللي اتعرضت له، قالي ما تنساش وصل الأمانة اللي أنت ماضيه.
