عامل دليفري يستغيث من شركة شهيرة: مضتني على إخلاء طرف عشان العميل مسمعش كلمة العفو.. وبتهددنى بوصل أمانة
أثار منشور كتبه شاب يدعى شهاب على مواقع التواصل الاجتماعي، حالة من الجدل الكبيرة حيث استغاث من شركة شهيرة، أوقفته عن العمل وهددته بوصل أمانة له.
عامل دليفري يستغيث من شركة شهيرة
وقال الشاب شهاب أبو سلامة: أنا دليفرى بعد ما سلمت الأوردر لعميل، وقالى شكرا قلت له العفو جيت أمشي فتح الشباك وبص عليا وكأنه بيشبّه برضو.
وتابع: روحت وبعد اليوم ما خلص الشركة قالت لي شهاب أنت معمول فيك شكوى، عشان مش مرتحالك وهتتحول تحقيق وهتقعد فى البيت.
وأوضح: أولا حسبى الله ونعم الوكيل فيك، كانت شكوى الرجل إنه كان قريب مني وهو بيسلمنى، ومسمعتش العفو كويسة لما قولتله شكرًا.
وأردف: دى الشكوى اللي تقفل باب رزق شاب بياخد كام ألف يعلم نفسه ويجوز نفسه من شخص بيقبض كتير.
وأكمل: الشركة مضتنى على إخلاء طرف، الإتش آر بعد ما مضاني على إخلاء طرف قلتله ده ظلم وأنا هتكلم عنه وهشهر باسم الشركة اللي تشارك فى الظلم ده، قالي متنساش إن ليك وصل أمانة أنت ماضي عليه عندنا.
وتفاعل مستخدمو مواقع التواصل الاجتماعي مع المنشور بشكل كبير، معبرين عن مدى حزنهم وغضبهم من الموقف الذي تعرض له هذا الشاب، على الرغم من عدم قيامه بأي شئ يستدعي فصله من العمل، وتهديده بوصلات أمانة، وتداولوا المنشور بشكل واسع رغبة في مساعدته.
