يشبه الجنة.. محمد فاضل وعبد الرحيم كمال يشيدان بمعرض الكتاب
أقيمت منذ قليل ندوة ضمن فعاليات معرض الكتاب الدولي لـ المخرج محمد فاضل والكاتب عبد الرحيم كمال، وهي بعنوان كتاب وجوائز، والتي تحدثا فيها عن أهمية المعرض وموقفهما من الحكم على الأعمال الفنية بشكل مسبق.
وقال محمد فاضل عن أهمية معرض الكتاب: معرض الكتاب ده لازم نحطه ضمن الأعياد القومية ومش حقيقي إن الناس مهتمة بالسوسيال ميديا فقط، واللي بيقولوا كده ينزلوا يشوفوا.
ومن جانبه، أوضح عبدالرحيم كمال حديثه: معرض الكتاب مهم وفي كاتب عالمي قال إنه يشبه الجنة، وهو فعلًا مكان جميل.
بشأن سؤالهما حول قيمة العمل الفني ونجاحه مقارنة بإيراداته، أوضح عبد الرحيم كمال: قيمة العمل مش بالملايين اللي بيحققها وممكن يبقى في عمل جايب ملايين ويكسر الدنيا لأن أذواق الناس مش مرتبطة ببعض أبدًا بأن قيمته تكون عالية، والنقد التريندي بقى أكبر من النقد الأكاديمي.
ليرد محمد فاضل على السؤال: بنقدم 30 مسلسل بس في فئة من الجمهور بتفضل تتكلم عن مسلسلها المفضل، وتحب فيه حتى لو اتعاد عشرات المرات.
وعن موقف جمعه بالفنان الراحل نور الشريف، أضاف عبد الرحيم كمال: كان أول درس اتعلمته من نور الشريف الله يرحمه لما قرأ اول حوار ليا وأنا عندي 19 سنة فقالي حوارك حلو بس محتاج يتفك لأنه أقرب للشعر والجمهور اللي بيتفرج عليك مش كده ودي كانت أول صدمة ليا واتعلمت أننا نتاقش جمهور بالبساطة لأن عندنا ناس مبتعرفش تقرأ وتكتب.
