الجودة في الأرض.. سيدة تشكو من شركة شهيرة للأجهزة الكهربائية: الزجاج اتكسر من أول يوم
اشتكت سيدة من منتجات شركة زانوسي للأجهزة الكهربائية، زاعمة انخفاض جودة منتجاتها وسوء خدمة ما بعد البيع، فضلا عن التعامل غير الملائم من الشركة تجاه العملاء.
سيدة تشكو من شركة شهيرة للأجهزة الكهربائية
وكتبت سيدة تُدعى خلود خالد عبر حسابها على موقع التواصل الاجتماعي فيسبوك: منصحش أبدًا حد يتعامل مع شركه زانوسي.. خدمة ما بعد البيع سيئة، ده غير الجودة اللي في الأرض.
وأضافت: اشتريت بوتجاز زانوسي كول ماكس 5 شعلة يوم 20 وصلني يوم 23 كلمت فني غاز يركبه، بتعليمات منهم وهو هيتصل يفعل الضمان، ولما الفني بيركب الغاز الزجاج سرطن وفرقع بدون ما حد يجي جنبه أصلا الفني كان شغال في الأنبوبة.
وواصلت: كل ما بنكلمهم نعمل شكوى كل شوية يدوا معاد إن حد هيجي يصلحه والنهاردة بنكلمهم تقولي تكلفة التصليح 2500 جنيه.. إزاي أنا أساسًا مستخدمتش الجهاز تقولي الزجاج خارج الضمان، وهو فين المنطق بجد أشتري جهاز من غير ما أستخدمه أصلا يحصل فيه مشكلة، والمفروض أنا اللي أصلح دا بدل ما يعتذروا ويحاولوا يعوضونا.
وأوضحت: وبعدين اكتشفت أن في كذا حد اشتكى من نفس الشكوى بدل ما يراجعوا نفسهم ويحسنوا المنتج ونوع الزجاج بيدفعونا ثمن أخطائهم، أصل سبحان الله كلنا بيحصل عندنا مشكلة في نفس الزجاج الخارجي صدفة بس هم منتجهم تمام، وحضرتك الكرتونة موجودة ولزق الحماية لسة متشالش حتى من على الجهاز.
