أقوال المتهم الخامس بقتل شقيق محامٍ بالقليوبية: قابلنا زمايلنا واتفقنا نطلع على الدائري نسرق موبايلات لكن قتلناه
يستكمل القاهرة 24، نشر التحقيقات في واقعة مقتل شقيق محامٍ بالقليوبية على يد تشكيل عصابي، اعترض طريقه خلال سيره على الطريق الدائري، ومحاولة سرقته تحت تهديد السلاح.
أقوال المتهم الخامس بقتل شقيق محامٍ بالقليوبية
وبمثول المتهم الخامس إسلام. ع. م، أمام جهات التحقيق المختصة وبسؤاله بشأن الواقعة؟، أجاب: اللي حصل بالظبط إني يوم الثلاثاء من حوالي 10 أيام أو 11 يوم؛ كنت اتقابلت أنا وخالد. ع، ومحمود. ع. ج، ومصطفى. ب، واتفقنا إننا هنطلع نشتغل على الدائري نسرق موبايلات وطلعنا وقابلنا مكنة موتسيكل وكان راكب عليها 3 هم أحمد. ر. ب، وخالد. ع. ا، ويوسف. إ، وكان أحمد، مش واخد باله مننا وبيحسب إننا بنقطع عليهم وهما بيسرقوا فرفع علينا الفرد بس مصطفى طلع من التوك توك وقاله أنا مصطفى متقلقش.
وأضاف المتهم الخامس: بعدين وقفنا ركنا سلمنا على بعض، واتفقنا إننا هنشتغل مع بعض على الدائري وهنمشي ورا بعض بالمكن، وفعلًا عملنا كده واحنا عرفنا نسرق موبايل، وهما سرقوا 3 موبايلات واتقابلنا عند نزلة مسطرد وقولنا كويس كده نروح بقى بس لما نزلنا لقينا أحمد. ر، شاف واحد ماشي على رجله وشايل شنطة كتف راح نده على مصطفى، وقاله تعالى نجيب الواد دا إكراه، ووقتها نزل من الموتوسيكل وعدى الطريق للراجل وفضل يتكلم معاه وطلع الفرد الخرطوش رفعه عليه، وقاله سيب الشنطة اللي معاك بس الرجل فضل ماسك في الشنطة راح أحمد فضل يضرب بجسم الفرد على راسه من ورا.
وتابع: الراجل برضه فضل متبت في الحاجة لحد ما أحمد راح ضربه طلقة في صدره من الناحية اليمين والراجل وقع، وبعدها أحمد نزل عليه أخد منه الشنطة الكتف والعربيات كانت هتقف تشوف إيه اللي حصل راح نزل مصطفى ضرب طلقة في الهوا في نص الطريق علشان يخوف الناس وأخدنا بعضنا وهربنا بسرعة روحنا المؤسسة بيعنا الموبايلات الواحد معرفش إسمه تبع مصطفى، وبعدها كان نصيبي 1200 جنيه وروحت على بيتنا، وبعد حوالي 4 أيام المباحث جولي البيت وأنا مكنتش موجود، ورئيس المباحث كلمني قالي تعالى على القسم وروحت سلمت نفسي في قسم ثان شبرا الخيمة، ودا كل اللي حصل.
س: وما هو الميقات الزمني لحدوث تلك الواقعة، وأين كانت تحديدا؟
ج: كانت يوم الثلاثاء من حوالي 10 أيام كده ومش فاكر التاريخ بالظبط، وكنا بالليل على الساعة 12 بالليل، وكنا على الطريق الدائري وبعدها نزلنا عند نزلة مسطرد - عند بنزينة مسطرد - سوق مسطرد.
س: وما سبب ومناسبة تواجدك بالزمان والمكان سالفي الذكر؟
ج: لأن كنا طالعين وقتها نسرق موبايلات من على الدائري فوق.
س: وإلى أين كانت وجهتكم عقب لقاءك مع خالد. ع. م، ومصطفى. س. م، ومحمود. ع. ج؟
ج: طلعنا على الدائري وبعد رشاح الخصوص لقينا مكنة وعليها 3 كانوا جايين عكس فكنا بنقفل عليهم بالتوك توك علشان نقطع عليهم ونثبتهم بس لما قربنا أوي من بعض لقينا أحمد وشهرته بوقه، راح رفع الفرد الخرطوش وبيحسب إن حد كان هيثبتهم أو هيقطع عليهم لأنهم كانوا شغالين في الوقت دا بيسرقوا من على الدائري بس اتأكدنا إنه أحمد، وكان معاه خالد، ويوسف، ومصطفى، ووقفنا سلمنا على بعض واتفقنا إننا نشتغل شوية نسرق من على الدائري أي موبايل أو أي حاجة سوا ومشينا وراء بعض وقتها عشان نشتغل.
