أحمد الفيشاوي: كنت شيطان وبحرض أصحابي على الغلط.. وحرقت فندق بسبب لعبة
كشف الفنان أحمد الفيشاوي عن العديد من الأسرار في حياته العملية والشخصية، بالإضافة إلى تجربته مع إدمان المخدرات قبل نجاحه في الإقلاع عنها.
وقال أحمد الفيشاوي خلال تصريحات تليفزيونية: أكبر مصيبة عملتها حرقت فندق كنت بلعب مع أصدقاء ليا، والأوتيل كان فيه أرض واسعة زي المنتجعات اللي بتتعمل دلوقتي حدائق وأشجار وكان عندي 17 سنة.
وأضاف أحمد الفيشاوي: الفندق كان فيه شعلات داخلها زيت، وقولت لأصدقائي يلا نلعب تحطيب بشعلات الزيت واللي شعلته تتكسر وتنزل النار على الزرع يبقى هو الخسران، وكانت النتيجة الفندق ولع والناس جريت.
وواصل: أبويا اللي تولى إصلاح الأوتيل وكان الفندق في القاهرة ووالدي اضطر يصلحه وعمل اتفاق مع ملاكه وقسط قيمة التصليح، وأنا كنت شيطان بحرض أصحابي على الغلط.
تصريحات أحمد الفيشاوي
كما أكد الفنان أحمد الفيشاوي، أن معظم الشباب بنسبة 99% يمر بمرحلة شرب المخدرات، قائلا: رحت لمرحلة شرب المخدرات ومكنتش هرجع وربنا أنقذني، وساعدت نفسي على العودة ومن غير ربنا كنت ضيعت، ودماغي اللي شدتني وأنا بحب أجرب وأشوف الحاجة جواها إيه.
وأوضح: جربت الحاجات المميتة والهروين بيموت والخمرة كترها بيموت والحمد لله بعدت عنها بأميال، ودخلت مصحات وعندي مصحة بدخلها بشكل دوري وفي جناح باسمي في المصحة.
وكشف أحمد الفيشاوي، عن أنه يذهب للمصحة النفسية حتى الآن، موضحا أنه فنان والفنان كثيرا شخصية معقدة وبيكون حساس ساعات بزيادة وقد يتعرض للأذى، قائلا: بضطر أعالج نفسي لكن عمري ما أدمنت المخدرات لكن أنا بتعالج نفسيا ودخلت المخدرات بمزاجي وخرجت بمزاجي.
