مستحيل تعمل كده.. مدير آية ضحية السقوط بالأردن: زوجها كسر لها لاب الشغل وقالها مش هتمسكي فلوس
تصدر اسم آية عادل تريند مواقع التواصل الاجتماعي خلال الساعات القليلة الماضية، بعد أن تداول مستخدمو مواقع التواصل الاجتماعي، منشورات حول وفاة آية عادل صالح، مصرية مقيمة في الأردن مع زوجها، والذي يعمل بإحدى المؤسسات الحقوقية.
زوجها كسر لها لاب الشغل وضربها وقالها مش هتمسكي فلوس
وقال مدير آية عادل بالعمل ويُدعى محمد ماهر في تصريحات لـ القاهرة 24: من أول ما عرفت آية وهي بنت مؤدبة ومحترمة، وأخلاقها عالية ومشوفتش منها أي حاجة وحشة، وبشهادة كل زملائها أنها بنت ملتزمة، ولما بدأت الشغل معانا كانت لسه متجوزتش.
وأضاف: بعد الزواج لاحظت تغيير كبير في حياة آية، زي أنها مبقتش ملتزمة خالص زي الأول، وطلبت تشتغل من البيت ووافقت ولكن اتفاجئت أنها اختفت كذا مرة وكنا بندور عليها وترجع تقول معلش عندي ظروف وحصلي مشاكل وكده، وأنا طبعا استغربت وقتها ولما ضغطت عليها حكت لي للأسف.
واستكمل: قالت لي حصلت لي مشاكل مع زوجي واعتدى عليا وكسرلي اللاب والتليفون، وقالي مش هتشتغلي ولا يكون ليكي مصدر دخل واوعي تفتكري إنك هيبقى ليكي شأن، في الحياة ولا تمسكي فلوس خالص.
واختتم: هي من عيلة محترمة، وعندهم التزام بالدين، وبعد فترة من الضرب اللي تعرضت له، رجعت تشتغل بالتليفون من غير ما يعرف، ولكن للأسف بعد فترة اكتشف الموضوع وخد التليفون منها، ومنعها من الشغل، كانت إنسانة طيبة.
