بسبب المساعدات المالية.. أكرم السعدني يوجه رسالة لـ محمد رمضان: أحمد زكي كان بيرص الفلوس في الشارع
استرشد الكاتب أكرم السعدني بموقف للفنان أحمد زكي، ليعطي محمد رمضان من خلاله درسًا ويوجه له رسالة جديدة، بعد إعلان الأخير تقديمه مساعدات مالية للجمهور في رمضان.
أكرم السعدني يوجه رسالة لـ محمد رمضان
وكتب أكرم السعدني منشورًا عبر حسابه الشخصي بموقع التواصل الاجتماعي فيس بوك، قال فيه: النجم الجميل محمد رمضان، على فكرة، أحمد زكي لما ربنا شاور عليه واتسلطت عليه بقعة ضوء غير طبيعية، والفلوس لعبت معاه، الكلام ده في التمانينات، كان بيجنب 2000 جنيه وأحيانًا أكثر، وينزل أي حي شعبي ويلف في الزنقة لحد ما يلاقي مكان العفاريت تخاف تعيش فيه، ويقوم راصص الـ 2000 جنيه جنب الحيطة.
وتابع أكرم السعدني: كان أصحابه يقولوا له: ليه كده يا أحمد؟ ما توزع كل خمسين جنيه في حتة أو تديهم للناس هيدعوا لك. يرد ويقول: لأ، كده اللي هيلاقي المبلغ ده في المكان ده، ويمسك الـ 2000 جنيه في إيده، هيطير من الفرح وهيحل كل مشاكله، لكن اللي هياخد خمسين جنيه هياكل أكلة حلوة وتنتهي الحكاية.
وأضاف السعدني: اللي كانوا عارفين الكلام ده هما الناس اللي قريبين من زكاوته، عصام إمام، المنتج الجميل والأخ الأصغر لعدول الأجمل، عادل إمام، وأيضًا الكاتب الساخر الرائع فؤاد معوض. وما فيش حد في الدنيا كان يعرف الخير اللي بيعمله أحمد زكي.. يا ريت تكون فهمت قصدي.
