ماجدة موريس: مفيش مقارنة بين محمد رمضان وعمرو سعد.. والأخير محافظ على شموخه في سيد الناس
علقت الناقدة الفنية ماجدة موريس، على الجدل المُثار مؤخرًا حول المقارنة بين الفنانين عمرو سعد ومحمد رمضان، حيث ربط الجمهور بين ديكور وأحداث مسلسل جعفر العمدة لـ رمضان، عقب نزول برومو سيد الناس لـ سعد، والمقرر عرضه في السباق الرمضاني 2025.
وقالت ماجدة موريس، في تصريح خاص لـ القاهرة 24: مش شايفة أي مقارنة بين عمرو سعد ومحمد رمضان، يمكن الناس اللي بتشوف دايمًا وبتحب هذا النوع من الأعمال شايفة أن فيه تشابه في الديكور أو غيره، ولكن عمرو سعد في حركة محافظ عليها في البرومو هي رفع الرأس والشموخ وعدم وجود أي تعبير إنساني على وشه ولا غضب ولا غيره.
عمرو سعد يرد على مقارنته بـ محمد رمضان
ومن ناحية أخرى، سبق وأن رد الفنان عمرو سعد، على مقارنته بالفنان محمد رمضان، حيث قال في تصريحاته لـ برنامج ET بالعربي: الكلام الكتير والهري على السوشيال ميديا، وأنا متعود أتكلم بوضوح تام وبصراحة وأنا بخجل أطلع أتكلم ومبحبش أشير إلى نجاح حققته أو نسب مشاهدة حققتها، وده حرصًا على مجهود كل الناس اللي بتشتغل وزملائي اللي بيعملوا أعمال رائعة وأنا بتابعها وبحبها وبكلمهم وأنا من جمهورهم لأن أنا بصدق أن مينفعش تشاور على نجاحك.
وواصل: إحنا بنحلم نعمل حاجة تبسط الجمهور، لكن للأسف الشديد الصمت بيتفهم غلط بعد توحش السوشيال ميديا، ووجود حملات مدفوعة الأجر لانطباعات معينة وكاذبة ومزيفة، للأسف الشديد أن الجمهور بتاعنا طيب ممكن يحصل تشويش لانطباعاته عن الأشخاص والأعمال ودي بقت حاجة غريبة ومريبة، بعد تفشي ظاهرة السوشيال ميديا ومتابعة الناس لـ التريندات، ويمكن الصمت بيتفهم غلط.
