عمرو سعد عن مسلسله سيد الناس في رمضان 2025: توقعات الجمهور مش دقيقة
تحدث الفنان عمرو سعد، عن مسلسله الجديد سيد الناس، الذي سيخوض به السباق الرمضاني 2025 في أول تعاون يجمعه مع المخرج محمد سامي، موضحًا أن توقعات الجمهور بشأن العمل بعد طرح البرومو الخاص به ليست دقيقة، وأن الجمهور سيتفاجأ بالأحداث.
وقال عمرو سعد، في تصريحاته لـ برنامج ET بالعربي: يمكن كان أكبر سؤال بيواجهنا وإحنا بنستعد لتقديم مسلسل السنة دي هو نوع الدراما اللي هنقدمها، إيه اللي هقدمه السنة دي مختلف في الشكل والمضمون، وإيه اللي هيقدمه المخرج محمد سامي وهو كاتب أعماله كمان مختلف عن اللي قدمه السنين اللي فاتت.
وتابع عمرو سعد: ده تحدي مش قليل وبعد النقاشات قرر المخرج أنه يختار دراما هو قال أنها جديدة عليه وعليا وعلى النجوم المشاركين، والناس هتتفاجئ أن توقعاتها مش دقيقة لما تحضر المسلسل بعد أيام، ويا رب يعجب الجمهور يأثر فيهم ويحبوه على قد المجهود الكبير اللي بذلناه في سيد الناس ورا الكاميرا.
عمرو سعد يعلق على مقارنته بـ محمد رمضان
كما علق الفنان عمرو سعد، على مقارنته بالفنان محمد رمضان، بعد طرح برومو مسلسله سيد الناس: الكلام الكتير على السوشيال ميديا، وأنا متعود أتكلم بوضوح تام وبصراحة وأنا بخجل أطلع أتكلم ومبحبش أشير إلى نجاح حققته أو نسب مشاهدة حققتها، وده حرصًا على مجهود كل الناس اللي بتشتغل وزملائي اللي بيعملوا أعمال رائعة وأنا بتابعها وبحبها وبكلمهم وأنا من جمهورهم لأن أنا بصدق أن مينفعش تشاور على نجاحك، إحنا بنحلم نعمل حاجة تبسط الجمهور.
وواصل: لكن للأسف الشديد الصمت بيتفهم غلط بعد توحش السوشيال ميديا، ووجود حملات مدفوعة الأجر لانطباعات معينة وكاذبة ومزيفة، وللأسف الشديد أن الجمهور بتاعنا طيب ممكن يحصل تشويش لـ انطباعاته عن الأشخاص والأعمال ودي بقت حاجة غريبة ومريبة، بعد تفشي ظاهرة السوشيال ميديا ومتابعة الناس لـ التريندات، ويمكن الصمت بيتفهم غلط.
