كان بيتعامل بالربا وعلطول مش معاه فلوس.. أحد جيران سفاح المعمورة يكشف تفاصيل حياته
تصدر اسم سفاح المعمورة، تريند مواقع التواصل الاجتماعي خلال الساعات الماضية، بعد العثور على الضحية الثالثة، والتي تعود إلى رجل اختفى منذ 3 سنوات، وخلال الأيام الماضية عثرت الشرطة على جثتين لسيدتين إحداهما كانت زوجته والأخرى موكلته، وأثارت تلك القضية حالة غضب واسعة بين مستخدمي مواقع التواصل الاجتماعي.
أحد جيران سفاح المعمورة يكشف تفاصيل حياته
وقال أحد جيران سفاح المعمورة، هشام شاهين في تصريحات خاصة لـ القاهرة 24: نصر الدين غازي المحامي كان واحد من المستأجرين في نفس البرج السكني بتاعي في شارع ابن الوليد بالإسكندرية، وكنت بتعامل معاه كتير وبيقعد معانا على القهوة.
وأضاف أحد جيران سفاح المعمورة: تصرفات سفاح المعمورة كانت غريبة أوي، كان بينزل ساعة يروح المحكمة ويجي يقولنا على القهوة القاضي أجل القضية، مش طبيعي محامي يروح المحكمة ويجي في ساعة خالص ولما كان يتكلم معانا مكنش بيعرف يتكلم في القانون خالص، وعلطول مكنش معاه فلوس حتى الراجل اللي كان مأجر منه مكنش بيدفعله الإيجار، ولا دفع لأي حد، كان بيقعد شوية في كل شقة ويسيبها ويمشي.
وأكمل أحد جيران سفاح المعمورة: ومراته كان شكلها غريب أوي واتجوزها عرفي ومكناش عارفين ومعاها طفل، كان لبسها متحرر جدا وبتشرب سجاير على الكافية، وبتيجي كل يوم تقعد من الصبح بدري أوي وأنا كنت ببقى مستغرب.
وأردف أحد جيران سفاح المعمورة: كان بيوهم اللي قدامه أنه كان في جلسة أو قضية لدرجة إني في مرة بصيت في الورق بتاعه، في يوم كنا فيه على القهوة لقيت تاريخ قديم أوي، وكان بيتعامل مع الناس بنظام الربا، وكان يوم معاه ويوم ممعهوش، وأكتر مواضيع كان بيتكلم فيها بيع الأراضي وكان هيبعلي أرض عن طريق الربا وأنا الحمد لله بعدت عن الموضوع خالص.
