سارة سلامة: محمد رمضان مش هيجي زيه.. ونفسي أشتغل معاه تاني
تحدثت الفنانة سارة سلامة، عن تعاونها مع الفنان محمد رمضان، في مسلسل ابن حلال، الذي عُرض في موسم رمضان 2014، وحقق نجاحًا جماهيريًا كبيرًا وقت عرضه.
وقالت سارة سلامة، في ندوتها بالقاهرة 24: أنا بحب محمد رمضان جدًا وطبعًا في تواصل بينا وأتمنى يجمعني بيه عمل تاني، وأنا بشوفه ناجح جدًا وشايفة أنه مبيستفزش الجمهور بـ أي حاجة، ودايمًا الناس مركزة معاه في كل حاجة طول الوقت.
وأردفت سارة سلامة: أنا بشوفه ناجح جدًا ومش هيجي زيه تاني، وهو جدع جدًا، وبتمنى ونفسي أشتغل معاه تاني، وأنا وهو صحاب جدًا من زمان.
وعن نجاح مسلسل ابن حلال، فعلقت سارة سلامة: رد الفعل مكانش طبيعي، لو كنت عملت فيلم بطولتي مكنش هيبقى كده، النجاح كان رهيب، ولما جالي الدور كنت هعتذر عنه، وخفت منه جدًا وأنا لما بخاف من حاجة بتبقى ضرب نار مش وسط حتى، واللي تخاف منه ميجيش أحسن منه.
سارة سلامة: متوقعتش الناس تعمل تريند هوت شورت سارة سلامة في ابن حلال
وأضافت سارة سلامة، عن شخصيتها بمسلسل ابن حلال: هو من الأدوار اللي قريبة جدًا من قلبي، وأنا مكنتش أعرف أن المسلسل بيناقش قصة حقيقية، وفي ناس زعلت مني أني جسدت الشخصية وجريمة القتل ولكني مكنتش أعرف وافتكرت أنه دور عادي، عرفت أنها قصة حقيقية بعد ما عملت المسلسل.
وواصلت سارة سلامة: الناس كلها بتقولي يا يسر في الشارع وطبعًا لقيت تريند هوت شورت سارة سلامة كتير جدًا وأنا كنت صغيرة أوي وقتها ومكنش أعرف أن هيبقى في كده، وقالوا لـ أحمد حاتم قتلت الصاروخ ليه.
