أبرز تصريحات أحمد داود: رفضت البطولة المطلقة بعد سجن النسا بسبب الخوف

تحدث الفنان أحمد داود عن تفاصيل مشواره الفني وعلاقته بـ أسرته وتفاصيل زواجه من الفنانة علا رشدي، وغيرها من الأمور، وذلك خلال لقاء تليفزيوني.

أبرز تصريحات أحمد داود مع معتز الدمرداش

وجاءت أبرز تصريحات أحمد داود كالتالي:

-  أنا خريج هندسة ميكانيكا جامعة حلوان، ولكن مشتغلش مهندس ولا يوم، والكلية كانت صعبة جدًا وأول ما دخلت دورت على المسرح، ووالدي قالي خلص شهادتك وأعمل اللي أنت عايزه وأنا لو عليا هقول لـ ولادي نفس الجملة.

- كنت ساكن في شارع السودان ونفسي عيالي يشفوه، وأهلي دلوقتي عايشين في الفسطاط عند المتحف المصري الكبير.

- بسمع الآراء طول الوقت ولكن مبقتش أتأثر، واتعلمت إني متوقعش حاجة أنا بشتغل والباقي على الله، وأنا مش عايز أعيش في نجاح الهوا سلطان كتير عايز أعمل حاجة تانية وأنجح فيها.

- مرفضتش فيلم ولاد رزق 3، أنا وقتها كنت بصور مسلسل زينهم، وفيلم الهوى سلطان وكمان برنامج الكونتينر، وهما كانوا عايزين يبدأوا تصوير حالًا فمكنش ينفع.

- لما عملت 122 وفيلم يوم 13 قالولي هو ده فيلم هيجيب فلوس؟، 3D إيه ونظارات إيه، ولغاية فيلم الهوى سلطان محدش كان متوقع إنه هينجح، وقالولي أنت هتسيب ولاد رزق علشان تعمل الهوى سلطان؟.

- فيلم يوم 13 قعدت مستنيه 3 سنين، ومحدش كان عارف إني هعمل فيلم بالحجم ده، وفي الوقت ده أتعرض عليا حاجات بفلوس أكتر بكتير وحاجات كانت ممكن تأذي الفيلم لما يتعرض.

- مش هنضحك على بعض لما بنرفض أول مرة حاجة كبيرة خلاص اللي بعد كده بيبقى سهل.

- قعدت كتير في موقف الميكروباص علشان أكون شخصيتي في مسلسل سجن النسا، وكنت بصور لبس السواقين وصوابعهم.

- خدت 150 جنيه في مسلسل بنت من شبرا، وأنا كنت عايز أمثل ومهتمتش بالأجر ورحت عملت هدوم وأجرت حاجات من المسرح بـ 450 جنيه، ولغاية دلوقتي أنا بحب أني مكنش محتاج للشغل بالنسبة للمنتج، لو الدور عاجبني أعمله مش عاجبني أنا تمام وبعرف أكل وأشرب وعندي عربية.

- اشتغلت قبل التمثيل في الدوبلاج وفي الإعلانات لغاية 2014.

- مبعرفش اتفرج على نفسي وأهلي موجودين معايا وبتوتر جدًا، وأهلي بيفضلوا مستغربين ومببقاش عايزهم يكلموني عن الشغل.

- مبحبش ولادي يشوفوا حاجاتي بالعافية، وابني بحب رأيه جدًا لأنه مبيعجبهوش حاجة، وبيشوف حاجات كتير أنها مصطنعة وبيحب يصور ويخرج.

- بحب جدًا الأطفال وبحب اسمع منهم، وابني قالي مش لازم تبقى مثالي وكانت نصيحة جميلة منه.

- مباخدش رأي مراتي في الاختيارات، ولكن باخد رأيها في الحاجة لما تخلص وتتعرض.

- اتجوزت وأنا صغير في العشرينات وبقيت أب وأنا في العشرينات ودي حاجة حلوة جدًا، ولما بتكبر شوية بتحس إنه أوعى تسيب نفسك وتضيع الفرصة الحقيقية اللي بتلاقيها مرة واحدة.

- والدة علا مكانتش موافقة ولا أمي، الأمهات كانوا هيبوظوا الجوازة ووالدتها كانت بتشوفني تقولي أنتوا أخوات.. والستات دايمًا عندهم مشاكل.

- كان بيتعرض عليا بطولة مسلسلات من بعد سجن النسا وكنت برفض من الخوف، كنت حاسس إني أشيل مسلسل 30 حلقة دي كبيرة جدًا.

- بقالي 10 سنين بعمل مسلسلات وأول مسلسل أنا بطله هو مسلسل زينهم اللي اتعمل من سنتين.

- أستاذ نور الشريف الله يرحمه هو اللي طلع جيل المخرجين بتاع عاطف الطيب ومحمد خان، هو اللي اداهم الفرصة وأنا حاسس إني بنتمي نفسيا للجيل القديم، الناس دي كان اللي بيحركهم الشغل والإنتاج والفن.