قلعت هدومها في المكان.. أول تعليق من العاملين بالمطعم على واقعة سيدة ادعت أنها ابنة مستشار: حررنا محضر ضدها
أثارت سيدة الجدل عبر منصات التواصل الاجتماعي، بنشرها فيديوهات أثناء تعديها على المواطنين في الأماكن العامة بالضرب والسب، زاعمة أنها ابنة مستشار وتابعة لجهات سيادية.
ونشرت السيدة التي تدّعي أنها بنت مستشار، عددًا من مقاطع الفيديو، عبر حسابها بموقع تبادل الصور والفيديوهات إنستجرام، وهي تتعدى لفظيًا على العاملين بأحد المطاعم في الشيخ زايد، لتوثق بعد ذلك تعديها بالضرب وصفع بائع مخبوزات في مكان آخر، كما نشرت فيديو من أمام أحد المستشفيات، وهي توبّخ أحد الأشخاص، قائلة: أنا بنت سيادة المستشار.
سيدة تدعي أنها بنت مستشار تتعدى بالضرب على المواطنين
وقالت إحدى العاملات، في مطعم بمنطقة الشيخ زايد، والذي تمت فيه واقعة التعدي على العاملين لفظيًا من قبل سيدة تدّعي أنها بنت المستشار، في تصريحات خاصة لـ القاهرة 24، هي جت المطعم يوم الأربعاء، ونزلت الفيديو اللي تم تداوله على منصات التواصل الاجتماعي، وأول ما دخلت المكان طلبت تقعد لوحدها في خيمة عربي، وبالفعل قعدناها فيها وقالتلي اقفلي عليا الستارة، وخدنا منها الأوردر وشوية وسمعنا صوت صويت دخلنا الخيمة نشوف فيه ايه، لقيناها قالعة البالطو والجزمة بتاعتها، كأنها قاعدة في أوضتها بالبيت، فضلت تزعق لنا.
وأضافت العاملة، سألناها بتصوتى ليه يا فندم.. حضرتك كويسة، ردت إزاي تدخلوا عليا من غير استئذان، واحنا كنا قلقانين عليها لا تكون اتكعبلت أو وقعت أو حصلها حاجة، لإن طول ما العميل في المكان فهو مسئول مننا، وفضلت تهين في كل العاملين في المكان، وكان شكلها مش طبيعي وكأنها شاربة حاجة، لإن هي عارفة هي بتعمل إيه، هي متزنة نفسيًا وعقليًا، ولكن شبه مش في وعيها وعينها كانت حمرا وبتدخن في الخيمة.
وأضافت العاملة، من بداية دخولها المطعم وهي عصبية على كل العاملين، وبتزعق، وطلبت من زميلتي تصورها ولما صورتها والصور معجبتهاش زعقت لها، ولما طلبت منيو الحلو بلغناها إنه لسه مش جاهز لإنها كانت جاية الساعة 2 الضهر فضلت تزعق برضه.
واستكملت عاملة المطعم: تم تحرير محضر بالواقعة وبعتنا تفريغ الكاميرات لـ النيابة، وهنستكمل في الإجراءات القانونية، لإن هي أهانت جميع العاملين في المطعم، وبتدّعي إن لها سلطة وصلاحيات، ودا مش حقيقي، واللي ظهر في الفيديو المتداول عبر منصات التواصل الاجتماعي جزء بسيط من إهانتها لينا.
