بسبب خطأ طبي| وفاة شاب خلال جراحة المرارة.. ووالده: دخل على رجله خرج جثة

توفي الشاب ناصر أحمد نور (29 عامًا) أثناء خضوعه لعملية استئصال المرارة بالمنظار داخل أحد المستشفيات الخاصة بمدينة نبروه، في واقعة أثارت صدمة أسرته.

وفاة شاب أثناء جراحة المرارة.. ووالده: دخل على رجله خرج جثة

 وكشف والده تفاصيل ماحدث للقاهرة 24: يقول والد الشاب: ابني رجع من الكويت من 3 أيام وكان عنده التهاب في المرارة، وبعد الكشف قررنا يعمل العملية لأنه كان بصحة جيدة وما عندوش أي أمراض. دخل المستشفى على رجليه وهو متفائل إنها عملية بسيطة، لكنه ما خرجش منها تاني.

بعد نص ساعة من بدء العملية، لاحظنا إن في ارتباك جوه غرفة العمليات، وكل ما نسأل حد ما حدش بيرد علينا. بعد شوية، خرج الدكتور الجراح وقال لنا: (الحمد لله، العملية نجحت، وابنك في الإفاقة)، فاطمنا.

لكن بعد ربع ساعة فقط، عاد الطبيب وأخبر الأب أن ابنه يعاني من نقص حاد في الأكسجين، طالبًا منهم الدعاء له.

يضيف الأب: فضلنا منتظرين، لكن الأطباء كانوا بيتحركوا بسرعة وقلق واضح عليهم، وبعد أكتر من نص ساعة، جالي الخبر اللي كسرني.. ابني مات!

لما استلمنا جثمانه، لقيناه ملفوف تمامًا وما كانش باين منه حاجة، وإدارة المستشفى أصرت نكفنه بسرعة بحجة إجازة العيد.

في الأول صدقنا كلامهم، لكن بعد ساعات، والدته كتبت بوست على (فيسبوك) بتعبر عن حزنها، وفوجئنا بعدها باتصال من نجل مدير المستشفى بيقول إن الخطأ الطبي كان من الدكتور الجراح، مش من المستشفى.

بسبب هذه المعلومات، قررت الأسرة اتخاذ الإجراءات القانونية، وحررت محضرًا للمطالبة بالتحقيق في أسباب الوفاة.

واختتم حديثه قائلًا: أنا مش باتهم حد، بس عايز أعرف ابني مات إزاي؟ كان شاب صغير وصحته كويسة، وساب طفل عمره 9 شهور ما شافوش غير 3 أيام بعد رجوعه. كل اللي بطلبه هو معرفة الحقيقة وأخذ حقه.