ياسر الهواري: سأقاضي بنك saib لأنهم تعاملوا معي ببلطجة وشهروا بي وبأسرتي
أعلن السياسي ياسر الهواري، عزمه مقاضاة بنك saib زاعمًا استخدامه أسلوب البلطجة والتشهير به وبأسرته بسبب تأخره في سداد أقساط قرض حصل عليه.
ياسر الهواري: سأقاضي بنك saib تعاملوا معي ببلطجة وشهروا بي وبأسرتي
وأضاف الهواري، خلال منشور عبر صفحته الرسمية على فيسبوك: من فترة وبعد إلحاح يشبه المحايلة على مبيعات البنك أخذت قرضًا بهدف تكبير الشغل وتوفير وقت لنفسي علشان المستحقات بتتأخر، الدنيا مشيت كويس وبعد شوية حصل أزمة سيولة فكنت بين اختيارين إما أتأخر في أقساط البنك وأتحمل الغرامة أو أتأخر في دفع مرتبات الناس، والحقيقة فضلت دفع المرتبات وأول ما الأزمة تتحل هدفع البنك عادي، وللحق التأخير تجاوز شهرين ودخلنا الثالث.
وواصل: مشكلة طبعًا، لكن اللي حصل من البنك تجاوز كل ما هو معقول: سيل من الاتصالات والتهديدات، في الأول تهديد بقضية، وبعد كده الموضوع تحول لبلطجة مش أي حاجه تانية، ناس تدعي أنهم محامين يروحوا عند البيت والشركة يكلموا البوابين وأفراد الأمن، وكل اللي يقابلهم يقولوا له كلام في منتهي القذارة، واتصالات بمراتي وواحد منهم بيقولها نصًا هو نصاب.
وأكمل: يبعتوا ناس تخبط على البيت لدرجة أن مرة واحد جه وأنا مش موجود ومراتي لوحدها، قالها أنا مش ماشي غير لما يجي، واتصالات من شركات التحصيل اللي البنك بيستخدمهم، وتم الاستعانة بستات ورجالة بشكل مسيء، الموضوع وصل للاتصال برقم أخت مراتي، كل ده علشان قسطين متأخرين وبيتصلوا بي وأنا برد عليهم.
وأوضح: أنا بحكي كل ده بعد ما الأزمة خلصت ودفعت الحمد لله كل المتأخرات اللي كانت نتيجة أزمة سيولة بتحصل مع أي حد بيشتغل في السوق والفلوس بتكون متجمدة في بضاعة لأن الفلوس كاش خطر كبير بسبب الارتفاعات المفاجئة للدولار، أنا بحكي ده لأني تعرضت أنا وأسرتي لعملية تشهير وترويع بواسطة بنك الناس بتتعامل معاه يوميًا واللي بقوله ده زي ما حصل معايا ممكن يحصل مع غيري.
واختتم: أنوي التقدم بشكوى لجهاز حماية المستهلك ورفع قضية على البنك وعندي كل الأدلة اللي تثبت كلامي، محادثات واتس آب ورسائل تهديد وشهادات الناس ومش هسيب حقي.
