أول تعليق من صاحبة كلب جولدن بعد قتله من آخر بيتبول بالمنيل: مالكه كان واقف يتفرج
تصدر فيديو لـ كلب بيتبول يهاجم آخر جولدن تريند مواقع التواصل الاجتماعي خلال الساعات القليلة الماضية، حيث هاجم البيتبول كلب جولدن بأحد الشوارع منطقة المنيل في القاهرة وسط الأهالي حتى قتله، ما آثار موجة غضب واستياء بين مسخدمي السوشيال ميديا.
أول تعليق من صاحبة كلب جولدن بعد قتله من آخر بيتبول
وقالت رباب جودة، صاحبة الكلب الجولدن، في تصريحات لـ القاهرة 24: الموضوع بدأ لما كنت بتمشي بكلابي في الشارع زي كل يوم بنزل الصبح بدري بيهم وقبل الفطار زي أي حد عنده كلاب، لكن المرة دي مختلفة، لأن وإحنا ماشين في الشارع فيه واحد عنده كلب بيتبول وكان واقف به لما عدينا.
وأضافت: طلبت منه يلبس الكلب بتاعه السديري المخصص للكلاب، اتفاجئت أنه شاله خالص، وبالتالي الكلب جري على كلبي الجولدن وهجم عليه، فضلت أبعده عنه بكل الطرق والناس كمان، عملوا المستحيل وضربوا الكلب بالشوم والعصيان، لكن للأسف مفيش فايدة خالص فيه، مسابش الكلب بتاعي غير وهو مقطع لحمه، منظر صعب محدش يستحمله.
وواصلت رباب جودة: روحت بالكلب بتاعي المستشفى على طول، وهناك عملوا اللي قدروا عليه وقالولي مش هنعرف نوقف النزيف خالص روحت، بالكلب وفضل ينزف لحد الساعة 7 الصبح كان مات خلاص، وحقيقي مش مسامحه صاحب الكلب على اللي عملوا فيه.
واختتمت: مفيش حاجة ممكن تعوضني عن الكلب ده بقاله معايا 8 سنين، وعمر ما حد اشتكى منه والأطفال كانت بتحب تلعب معاه جدا وشايفينه جميل.
