أحمد العوضي: التعامل مع الجمهور ملوش علاقة بالنجومية.. ومش رجولة أهاجم حد من زملائي
تحدث الفنان أحمد العوضي عن طريقة تعامله مع جمهوره، بجانب تعليقه على حديث بعض زملائه الفنانين عنه في البرامج التليفزيونية، مؤكدًا أنه من المستحيل أن يهاجم أحدًا من زملائه.
العوضي: التعامل مع الناس ملوش علاقة بالنجومية
وقال أحمد العوضي في مقابلته عبر منصة Watch It: التعامل مع الناس ملوش علاقة بالنجومية.. من تواضع لله رفعه، ولا يدخل الجنة من كان في قلبه ذرة من كِبر، وأي حد بيحبني هو بالنسبة ليا أخ مينفعش أردله الحب ده بـ كِبر، بالعكس ده أنا أشيله على رأسي.
وعن حديث الفنانين عنه في البرامج التليفزيونية، أضاف: مينفعش أطلع أهاجم حد قدام كاميرا وهو قاعد في البيت، دي مش مرجلة ولا جدعنة، هبقى راجل ضعيف الشخصية وعندي نقص، وطالما أنا في الشغلانة ممنوع انتقد أو أغلط في زميل، ودي تربية وأصول مالهاش دعوة بالفن.
كما علق أحمد العوضي على الانتقادت التي يتعرض لها حتى قبل عرض أعماله قائلًا: كل واحد بيتكلم بيبقى مفكر أنه مجتمع، ولو أنا مش ناجح هو مش هيتكلم، اللي عايز يتكلم وينتقد يعمل ده، وفي الآخر أنا مبلتفتش للانتقادات ولا عمري رديت، لو اتوجهلي الإهانة بشكل شخصي هرد.
واختتم أحمد العوضي حديثه: كل واحد له الحق يتكلم زي ما هو عايز، والكلام مش بيغير من الواقع شيء، النجاح والفشل مقسومين، من حق الناس تتكلم وأنا المفروض مزعلش، وعمري ما اتضايقت لأني ببص على اللي بيحبني وباخد طاقة الحب منه ومبلتفتش للي مبيحبنيش، ومن حقه مبحبنيش مفيش حد في الدنيا الناس اتفقت عليه.
