معاشي على قد الإيجار.. مجدي عبد الحليم يستغيث: فكرت أسيب عيالي وأروح أقعد في دار مسنين | بث مباشر

استغاث الفنان مجدي عبد الحليم، خلال لقائه مع القاهرة 24، بسبب تدهور أحواله المادية في الفترة الأخيرة، مع قلة الأعمال الفنية المعروضة عليه.

استغاثة الفنان مجدي عبد الحليم

وقال مجدي عبد الحليم: أنا عمري ما غبت عن الأضواء، بس الدنيا اختلفت والسوق اختلف.. ولكن أنا عمري ما بصيت لحاجة اسمها دور كبير أو دور صغير والفترة اللي فاتت اتعرض عليا أعمال زمان مكنتش أقدر أعملها، ولكن عشان أكل العيش عملتها.

وأضاف: دايمًا كنت عامل زي النعامة بخبي راسي في الرمل، زي ما بيقولوا تحت ستار القناعة، ولكن أنت كـ فنان لازم تدور على حقك وهفضل أطالب لحد ما أموت إنه يتم التعامل مع الفنانين برحمة شوية.

وأشار الفنان مجدي عبد الحليم إلى أنه لا يملك مصدر رزق آخر سوى عمله في مجال الفن، معقبا: أنا طلعت معاش ومعاشي على قد الإيجار وباقي الشهر يا عالم بيمشي إزاي.. بس الحمد لله بيمشي عشان ربنا مش بينسى حد.

واختتم حديثه: مش عايز أقول إني هبطل المهنة طب إزاي هبطلها وأنا لسه بصحتي.. ولكن هل مشهد في فيلم أو مسلسل كافي عشان الفنان يعيش حياته 30 يوم في الشهر؟، أنا عندي ابن على وش جواز وعندي متاعب كتير أنا وحدي اللي بتحملها.. والحقيقي أنا تعبت لدرجة إني مش لاقي أدفع اشتراك النقابة والعلاج.. وفكرت أسيب عيالي وأروح أقعد في دار مسنين عشان أهرب من عيون الناس.