أحمد عبد الوهاب: شاركت في الكابتن علشان أشتغل مع أكرم حسني.. وبحب أبقى طول الوقت في تحدي مع نفسي
تحدث الفنان أحمد عبد الوهاب، عن مشاركته في مسلسل الكابتن بطولة الفنان أكرم حسني، بجانب مشاركته في مسلسلي كامل العدد وأشغال شقة جدًا، خلال السباق الرمضاني 2025.
وقال أحمد عبد الوهاب، في لقائه مع القاهرة 24: اللي حمسني لتجربة مسلسل الكابتن هو أكرم حسني، لأني بحبه ونفسي أشتغل معاه من زمان وبحب ضحكي، وأول ما كلمني قولتله يلا وأنا اتبسطت بالشغل معاه، متابع ردود الفعل من السوشيال ميديا فالحمد لله رد فعل الناس كان حلو جدا وتصاعدي.
وتابع أحمد عبد الوهاب: شاركت في 3 أعمال كوميدي في رمضان لأني قولت أبقى متأمن، إيه الكوميدي أشارك فيه واللي ينجح منهم يبقى كرم من ربنا والحمد لله الثلاثة حققوا نجاح كبير.
وواصل: المشاركة في 3 أعمال مع بعض كان صعب وجيت في فترة بعد ما صورت قولت هو أنا صح ولا لأ وقُلت الشخصيات هتدخل في بعض، ولكني بحب أبقى طول الوقت في تحدي مع نفسي، السنة اللي فاتت كان الحشاشين مع أشغال شقة والسنة دي حاولت يكون في تنوع في الأدوار، وفي الآخر التمثيل لعب.
مسلسل الكابتن
ومسلسل الكابتن عُرض في النصف الأول من شهر رمضان، ويتكون من 15 حلقة، وهو من بطولة أكرم حسني واَية سماحة وسوسن بدر وأحمد عبد الوهاب ورحمة أحمد فرج وميمي جمال ومحمد رضوان وسامي مغاوري وأحمد الرافعي وعمر شرقي ووئام مجدي، وهو قصة أيمن الشايب وتأليف عمرو الدالي، ومن إخراج معتز التوني، وإنتاج كريم أبو ذكري.
