ريهام حجاج عن مناقشتها للقضية الفلسطينية بمسلسل أثينا: لازم نفكر الشباب
تحدثت الفنانة ريهام حجاج، عن مناقشتها للقضية الفلسطينية خلال أحداث مسلسل أثينا، والذي يعرض حاليًا ضمن السباق الرمضاني 2025 وحقق نجاحًا كبيرًا منذ عرض أولى حلقاته.
ريهام حجاج عن مناقشتها للقضية الفلسطينية بمسلسل أثينا: لازم نفكر الشباب
وقالت ريهام حجاج في لقائها مع القاهرة 24: كل عمل فني بيكون فيه حتة من روح الفنان اللي بيقدمه، وأكيد إحنا بندور على النصوص المهمة واللي قلبنا بيختاره بنروح له، وساعات النص هو اللي بيختار، ونصيب من عند ربنا وحاجات كتير، بس عمومًا أي نص أي فنان بيقدمه بيبقى فيه من روحه وفكره.
وتابعت ريهام حجاج: محبش أقول على نفسي إني داعمة للقضية الفلسطينية ولكني عندي وجهة نظر إن مينفعش ننسى القضية الفلسطينية ولازم طول الوقت نفكر الأجيال الجديدة ونفكر الشباب إن القضية مينفعش تتنسي، هي مش بس قضية سياسية هي قضية دينية، وفي الآخر سلبياتها هتطولنا كلنا.
مسلسل أثينا
وسبق وأن تحدثت ريهام حجاج عن مسلسل أثينا، في تصريحات تليفزيونية قائلة: المسلسل مجازفة محسوبة، والعمل مش من قصة حقيقية، بس فيه أطفال كتير انتحرت بسبب الدارك ويب، وضغط السوشيال ميديا، ده بيحصل كتير بس هي مش قصة حقيقية، والتأثير السلبي للسوشيال ميديا أكتر من الإيجابي، ودي حرب جيل تالت ورابع، والـ AI بينتشر بشكل مخيف، مش عارفين نفرق من الحقيقية والكذب، كان عندنا مشاعر قبل وجود السوشيال ميديا أكتر، وبنتربى من أهالينا أكتر، دلوقتي السوشيال ميديا هي اللي بتربي.
