فيه مفاجأة هتتذاع بعد الفطار.. صديق مقرب لشيكا يكشف كواليس زيارة محمد رمضان
تصدر اسم لاعب نادي الزمالك الأسبق، إبراهيم شيكا، تريند مواقع التواصل الاجتماعي خلال الساعات الأخيرة، بعد زيارة الفنان محمد رمضان له في مستشفى بالتجمع الخامس، إثر تدهور حالته الصحية بسبب مرض سرطان المستقيم.
صديق مقرب لشيكا يكشف كواليس زيارة محمد رمضان
وقال صديق مقرب للاعب إبراهيم شيكا، ويدعى محمد إيهاب، في تصريحات خاصة لـ القاهرة 24: الحمد لله شيكا بخير وبقى أحسن بفضل ربنا، وبعد زيارة محمد رمضان له، فرقت جدًا معاه وفي نفسيته وبيطمن الناس كلها عنه وعن صحته، والحمد لله هو أحسن عشان ناس كتير بتدعيله بالشفاء.
وتابع: أمس اتفاجئنا باتصال من برنامج "مدفع رمضان" بيقولوا لنا إن محمد رمضان هيجي يزور شيكا في المستشفى، وده فرحنا جدًا الحقيقة، ولما محمد رمضان جالنا المستشفى صور معاه كام لقطة لبرنامج "مدفع رمضان"، والحلقة هتتعرض النهاردة بعد الإفطار إن شاء الله.
وأضاف: زيارة محمد رمضان لشيكا كانت دعم كبير على المستوى النفسي والمعنوي، وفرقت في حالته النفسية، الحمد لله هو بخير. كمان قدمله جائزة بسيطة في الزيارة دي. شيكا ربنا محبب فيه خلقه سبحان الله، وناس كتير بيكلمونا ونفسهم يزوروه في المستشفى، حتى ممثل عراقي، أمس كلمنا وقال إنه عايز ييجي المستشفى.
واختتم: الفترة اللي فاتت للأسف، انتشرت شائعات كتير عن مرض شيكا، وفيه ناس طلعت تقول كلام مش صح خالص. أنا صديقة من زمان وبقعد معاه في المستشفى كتير، تقريبًا بروح له بشكل يومي، ولقيت للأسف إن في شائعات كتير انتشرت وناس طلعت تقول إنه بعد الشر مات، وناس بتترحم عليه. لكن الحمد لله هو عايش وربنا يطول في عمره.
