قتلوني يا هند.. ننشر التحقيقات في قضية مقتل شقيق محامٍ بالقليوبية | خاص
كشفت التحقيقات في واقعة مقتل شقيق محامٍ بالقليوبية على يد تشكيل عصابي اعترض طريقه خلال سيره على الطريق الدائري ومحاولة سرقته تحت تهديد السلاح، تفاصيل الواقعة.
التحقيقات في قضية مقتل شقيق محامٍ بالقليوبية
وحصل القاهرة 24 على نص التحقيقات في القضية، واستمع رجال التحقيق إلى أقوال زوجة المجني عليه وجاءت أقوال كالآتي: اللي حصل إن جوزي كان رجع من الشغل بتاريخ 2024/8/21 وحوالي الساعة 2:10 صباحا لقيته اتصل عليا وقالي أنا راجع من الشغل وجيت أركب توكتوك قالي 30 جنيه وهو ما كانش معاه فلوس غير 45 جنيه وعايز يروح إمبابة عند أمه وفضل يكلمني على التليفون لحد ما سمعت صوت حد بيقوله الساعة كام وهو رد عليه وقاله 2:30 وفضل ماشي وهو بيكلمني في التليفون لحد لما حد تاني سأله قاله الاستيراد منين قاله معرفش كمل معايا على التليفون.
وأضافت زوجة المجني عليه: وبعد كده سأل واحد وقاله الدائري منين فسمعت قاله سيب أول سلم وأطلع تاني سلم وبعد كدة فضل معايا على التليفون لحد ما سمعت صوت حد بيقول لجوزي صوته تخين وصوت حد تاني بقوله اقف يالا وشتمه وقاله مش بقولك اقف وشتمه ثاني وبعدين سمعت صوت خالد جوزي يقول للناس من غير ضرب وبيصرخ وبيقولهم معايش حاجة عشان تاخدوها لأن أنا معايش حاجة ولقيت خالد بيصرخ ويقول قتلوني يا هند وخدوا حاجتي أشهد أن لا إله إلا الله.
وتابعت: بعدها الخط قطع بيني وبينه وحاولت اتصل به تاني كان بيديني جرس بس محدش كان بيرد عليه لحد الساعة 5 الصبح ومعرفتش حاجة عن جوزي وبعدين لقيت تليفونه اتقفل وكلمت أخوه وأمه محدش عارف عنه حاجة وتاني يوم كلمت النجدة علشان أعرف جوزي فين ومعرفتش أوصل لحاجة.
وأردفت: ويوم 2024/8/23 أخوه وليد كلمني وقالي دورت على خالد في المستشفيات والأقسام ما وصلتش لحاجة لحد ما رحنا مشرحة زينهم نسال على جوزي وهناك شفت جثة واتعرفت عليها إن دية جثة جوزي وكمان أخوه وليد اتعرف عليه وأخوه وليد راح قسم تاني شبرا الخيمة وعمل محضر إنه اتعرف على جثة جوزي خالد والنهاردة جيت على النيابة علشان أقول أقوالي وأخد تصريح بدفن جثمان جوزي وده كل اللي أعرفه.
