زوجة تطلب الطلاق: جوزي بيديني إنذارات لما بغلط زي الشغل
في واقعة غريبة أمام محكمة الأسرة، تقدمت زوجة بدعوى طلاق ضد زوجها، متهمةً إياه بمعاملتها وكأنها موظفة لديه، حيث وضع لها لائحة عقوبات داخل المنزل، تشمل خصومات وإنذارات إذا لم تلتزم بقواعده الصارمة.
حكايات محكمة الأسرة
وقالت الزوجة في دعواها: جوزي حول البيت لمكتب إداري، عنده دفتر بيسجل فيه أخطائي، لو نسيت أحط الملح في الأكل، باخد منه إنذار، لو رديت عليه بطريقة مش عاجباه، بيقول ده لفت نظر، ولو اتكررت الغلطة، يبقى فيه خصم من المصروف أو منع للخروج.
وأضافت: حاولت أتكلم معاه وأقوله إن الحياة الزوجية مش شركة، وإن الجواز قائم على الحب والتفاهم، لكنه كان مصر على تطبيق نظامه، ولما اعترضت، قالي: حتى الشركات الناجحة لازم يكون فيها نظام عقوبات عشان تمشي صح.
أما الزوج، فقد دافع عن نفسه، مؤكدًا أن فكرته كانت مجرد وسيلة لتنظيم الحياة داخل المنزل، مضيفًا: الالتزام والنظام عمره ما كان عيب، بالعكس، ده اللي بيخلي أي علاقة ناجحة.
المحكمة قررت تأجيل القضية لمراجعة تفاصيلها، وسط حالة من الجدل بين الحاضرين، فالبعض رأى أن الزوجة معها حق في رفض هذه القواعد الصارمة، بينما اعتبر آخرون أن الرجل كان فقط يحاول إدارة حياته الزوجية بأسلوبه الخاص.
