حمادة هلال: كل العاملين بمهنة الغناء عايشين في صراع الحرمانية
كشف الفنان حمادة هلال، العديد من الأسرار والكواليس في مشواره الفني منذ بدايته حتى الآن، مشيرا إلى أنه حصل على أجور قليلة في بداياته.
وقال حمادة هلال خلال تصريحات تليفزيونية: أول أوردر عملته كسبت فيه 5 جنيهات، وكان ليا صاحبي هادي أبو اليزيد وهو شاعر كبير وكتب لي معظم الأغاني اللي نجحت.
وأضاف: كنت بطلع أغني ببلاش ومكنتش عايز فلوس وكان المهم بالنسبة لي أغني، وأول 5 جنيهات خذتها جبت هدية لأمي، كانت إيشارب، ووالدي كان تعبان ومن الحاجات اللي خلتني أبعد فترة عن الغناء هو تعبه.
تصريحات حمادة هلال
وأوضح: عديت بمرحلة الغناء في الأفراح الشعبي، واكتسبت منها الجانب الإيجابي وتعلمت من السلبي وشفت اللي مشي في السلبي حصل له إيه، وعيشت في الزاوية الحمراء وما زال أصدقائي هناك لكن أنا اتولدت في الشرقية.
وحول حرمانية الفن، قال حمادة هلال: أراهن أن كل اللي موجودين في الشغلة عندهم نفس الصراع بتاع الحرمانية، وأنا عن نفسي جتلي فترة تعرضت لكلام قاسي، وبدعي وبقول ربنا يهديني ومش بتريق وبدعي ربنا يهديني للطريق الصح، وكل إنسان بيقدر يحط نفسه في الحتة اللي عارفها كويس.
