تامر حسني يوجه نصيحة للشباب من واقع تجربته: اقلب الصفحة يا صاحبي محدش هينفعك
وجّه الفنان تامر حسني نصيحة للشباب، مع بداية شهر رمضان المبارك، يحثهم فيها على البدء من جديد، والعمل على تحقيق حلمهم، مع النظر للمستقبل حتى يصلوا لما يريدون.
تامر حسني يوجه نصيحة للشباب
وكتب تامر حسني منشورًا، عبر حسابه الشخصي بموقع التواصل الاجتماعي فيس بوك، قال فيه: بروحانيات شهر رمضان الكريم زي ما متعودين إني بحاول من واقع الدنيا ومشواري الشخصي أي شيء بتعلمه لازم أوصلهلكم بعيدًا عن الفن تمامًا.. عمركم شوفتوا حد عايز يطلع خطوة قدام وباصص وراه أكيد مش هيعرف، طب هل فيه حد ممكن يبدأ جزء جديد في كتاب حياته، وليكن الجزء الثاني وهو قاعد لسه بيقرأ الجزء الأولاني أكيد لا طب يعمل إيه؟.
وأضاف تامر حسني: أقولك أنا … يقلب الصفحة بس كده، ويركز في حاضره لأن اللي فات مش هيعرف يغير فيه حاجة فا ليه بيضيع وقت مع اللي فات طب الحاضر أولى إنسى اللي فات يا صاحبي وأقلب الصفحة، يلا وأبدأ حالًا محدش هينفعك والعمر بيجري، يلا أقلب الصفحة وأقلبها بجد مش أي كلام يعني بجد تنسى كل اللي تعبك زمان وكل ما تحبط افتكر إنك مادام صحيت ليوم جديد ولسه عايش ماموتّش، أعرف إن لسة ربنا عايز منك حاجات يعني ليك لازمة كبيرة جدًا يلا قوم دور عليها وأقلب الصفحة وابدأ بصفحة جديدة جميلة زيك.
وأضاف تامر حسني: والله والله ده كلام حقيقي من واقع الحياة، ومن واقع تجربة أي حد حلم وقدر يحقق أحلامه، مادام صحيت أنت ليك لازمة قوم يلا أقلب الصفحة.
