احتيال عقاري ضخم| 4000 أسرة تفقد 2.5 مليار جنيه في مشروعات وهمية.. وأحد الضحايا: صاحب الشركة عليه 300 حكم وهربان
في واقعة احتيال عقاري كبرى، تعرض مدحت نبيل، إلى جانب 4.000 أسرة أخرى، لعملية نصب من قبل شركة بيتك بإيدك المملوكة لمحمود عبد الشافي، حيث استولت الشركة على نحو 2.5 مليار جنيه من المواطنين، بعد إغرائهم بمشروعات سكنية وهمية.
4000 أسرة تفقد 2.5 مليار جنيه في مشروعات وهمية
وذكر مدحت نبيل في تصريحات خاصة لـ القاهرة 24، تفاصيل عملية النصب، الذي تعرض لها رفقة 4000 أسرة قائلًا: من عام 2018، تعاقدنا مع شركة بيتك بإيدك في 29 مشروع، سواء وحدات تجارية أو سكنية وأسهم تجارية، وحصلت مشكلة كبيرة سنة 2020، لأن الشركة معملتش المشاريع دي، وكانت وهمية، و90% منها متعملش.
وأضاف: اكتشفنا أن العقود اللي كانت بين الشركة والأراضي اللي هيتبني عليها المشاريع تم فسخها بسبب عدم التزامها بدفع الالتزامات المالية، وبسبب كده معظم الأهالي عملوا محاضر ضد محمود عبد الشافي، وصدر قرار ضده بمنعه من السفر والتحفظ على أمواله، لكن هربان في الوقت الحالي، وهو عليه 300 حكم، وما يقرب 400 سنة سجن.
وأكمل: ودلوقتي رجع يشتغل تاني على مواقع التواصل الاجتماعي، وبيحاول يوهم الناس ببيع وحدات وعقارات وبيسوق لشركات تانية، وفيه ناس كتير ماتت بسبب الزعل بعد ما اتنصب عليها، وفيه ناس تاني حصلها جلطات وركبت دعامات في القلب بسبب الزعل على ضياع فلوسهم، وفيه ناس اطلقت وبيتها اتخرب.
وواصل: بالنسبة لحجم الأموال التي استولى عليها محمود عبد الشافي صاحب شركة بيتك بإيدك، حوالي 2 مليار و300 مليون جنيه، ونفسنا أن فلوسنا وحقنا يرجع.
