إحدى ضحايا منصة FBC: خسرت 11 ألف جنيه.. وجارتي كانت معانا جاتلها جلطة
تصدر اسم شركة FBC مواقع التواصل الاجتماعي خلال الساعات الماضية، بعد أن تعرض أكثر من مليون شخص من بينهم مستثمرون مصريون لخسائر مالية فادحة عبر المنصة، وفق شكاوى وبلاغات تقدموا بها للجهات المختصة.
إحدى ضحايا منصة FBC: خسرت 11 ألف جنيه.. وجارتي كانت معانا جاتلها جلطة
وقدّرت الخسائر الناجمة عن هذه العملية بأكثر من 6 مليارات دولار، حيث وقع الضحايا في فخ وعود زائفة بتحقيق أرباح سريعة عبر الإنترنت، مستغلين منصات التواصل الاجتماعي في الترويج لها.
إحدى ضحايا منصة FBC
وقالت هناء أحمد، إحدى ضحايا المنصة في تصريحات خاصة لـ القاهرة 24: من 15 يوم لقيت واحدة جارتنا بتقولي أنا وباقي الجيران فيه ليكوا عندي شغل أونلاين ومربح فلوس كتيير، ولما سألناها قالت هتدخلوا على المنصة برقم الموبايل والموضوع سهل خالص، وفعلا سجلنا وبدأنا.
وتابعت: جارتنا دي طلبت مننا نعمل محفظة وقالت حطوا أي مبلغ 500 ج أو 900 ج والأفضل تحطوا رقم كبير عشان تكسبوا أكتر من اللي حطيتوه على البرنامج، وطريقة الشغل دي كانت فى ناس بتشوف فيديوهات وناس بتلعب لعبة أو بتنزل برامج وألعاب مهمات بتتعمل كل يوم ونخلصها بينزلنا فلوس.
وأكملت: فيه محفظة للفلوس عشان ننزلها، وكان فيه لعبة اسمها عجلة الحظ والقبض كان يوم الخميس اللي فات وجينا ندخل معرفناش، وظهرلنا أن المنصة اتقفلت ومن ساعتها وإحنا شايلين الهم وبنكلم نفسنا مش عارفين نعمل إيه في الكارثة دي، وأنا خسرت 11 ألف جنيه وليا جيراني باعوا اللي وراهم واللي قدامهم واشتركوا في اللعبة دي وجارتي فلوسها كلها ضاعت وجالها جلطة بسبب اللي حصل، وحتى جارتنا اللي عرفتنا على المنصة دي اختفت وتقريبا عملت لنا بلوك من كل حاجة.
