عمرو يوسف: أحمد السقا السبب إننا نعمل أكشن بنفسنا.. ويئست من تغيير نظرة الناس للتمثيل
تحدث الفنان عمرو يوسف، عن مشاهد الأكشن التي قدمها في فيلم شقو، موضحًا أن الفنان أحمد السقا من أوائل الفنانين الذين قدموا الأكشن بأنفسهم دون الاستعانة بـ دوبلير.
وقال عمرو يوسف، في بودكاست حوارات مع عباس: أنا عملت كل مشاهد الأكشن في فيلم شقو بنفسي ونطيت من الدور الخامس، وأحمد السقا هو السبب إننا نعمل أكشن بنفسنا، ونقل الحكاية دي من البداية في حتة تانية، وكان بيحارب على حاجات اللي حواليه مش فاهمينها.
كما أعرب عمرو يوسف، عن استيائه بسبب نظرة الجمهور حول سهولة مهنة التمثيل من عدمها، قائلًا: في منظور عام جالي يأس من أني أغيره، الناس معتقدة أن مهنة التمثيل سهلة، المهنة دي شاقة جدًا، وكل ما تبقى نجم كل ما تزيد صعوبة وياما خدت في الرجلين ناس كتير وبتتفرم.
عمرو يوسف: ضحيت بفلوس الإعلانات علشان التمثيل
بينما تحدث عمرو يوسف، عن بدايته قائلًا: في بدايتي من الإعلانات وصلت لمرحلة أني كنت باخد في يوم تصوير الإعلان 8000 جنيه، وده كان رقم كبير وقتها اشتغلت إعلانات لمدة سنة ونص بالكتير عملت فيهم أكتر من 20 ألف جنيه، وأجري في قناة روتانا في الشهر كله كان 8000 جنيه، ووصلت للتمثيل بعد 7 سنين كفاح وتضحية بالفلوس.
