بسبب الإهمال الطبي.. فتاة تستغيث من طبيب أسنان بالدقهلية: حصلي التهاب وفمي اتعوج وكان بيتهرب مني
استغاثت فتاة تُدعى دعاء رمضان، من منطقة نبروه، التابعة لـ محافظة الدقهلية، من دكتور أسنان بعد فشل تقويم الأسنان الذي أجرته منذ عام 2021، وحتى الآن لم تتعافى الفتاة البالغة من العمر 20 عامًا من تأثيراته السلبية على الفم واللثة، حيث تسبب لها في التهاب شديد بـ الفم.
وقالت دعاء رمضان في تصريحات خاصة لـ القاهرة 24: بدأت في التقويم سنة 2021، عشان كان عندي مسافات بين الأسنان، وروحت عند دكتور ناس كتير شكروا فيه وقالولي إنه كويس، وعلى الأساس ده روحتله.
وتابعت: لكن كل مرة كنت بروحله بحس إن فيه حاجة غلط وحالتي بتسوء أكتر وأسناني لقيتها بتوجعني عن الأول، لدرجة إن فيه مرة حصلي التهاب شديد ومبقتش قادرة أفتح بوقي حتى ولا أتكلم.
فتاة تستغيث من طبيب أسنان بالمنصورة
وتابعت: الدكتور حسبي الله ونعم الوكيل فيه وينتقم منه، دمر أسناني خالص وأشك إنه كان دكتور أصلا لدرجة أن بوقي من فترة أتعوج وكل اللي كان بيشوفني بيقولي أنتي عندك جلطة ولا إيه بسبب إن الدكتور ركبلي التقويم من غير أي إشاعة ولا أي حاجة وحط التقويم من غير تنظيف، لا شاف هل فيه تسوس ولا لأ، ولا كان عنده أي ضمير.
وأضافت: بدأ يحصلي ميلان في الأسنان واللثة نزلت، راح قطعلي اللثة بـ مشرط جراحي في العيادة، وعيادته كانت في قمة الإهمال، وركبلي في مرة زي حديدة في ضرسي، فضلت كتير أقوله عليه إن الجذور باينة والضرس حساه هيتخلع ووجعني، بس لا حياة لمن تنادي كان بيطنش لحد ما روحت لدكتور تاني وشال الحديد.
وأردفت: قطع الحديد بتاعت التقويم لما كانت بتقع وهي كانت بتقع بطريقة غريبة، والأستك بيقوم واقع بس كنت بقوله وكان بيطنش ولا كان بيركبها تاني ولا يركب غيرها مع إني كنت بروحله كل أسبوع مرة يغيرلها سلك مرة وأستك مرة.
واختتمت: تواصل الدكتور معايا كان سلبي، وطريقته كانت سيئة جدًا وممكن يزعقلي لدرجة إني كنت بأخد حد معايا وأنا ريحاله بسبب طريقته الوحشة كنت بخاف أشتكي له من أي حاجة، ولما ببعتله واتساب بيعمل نفسه مش عارفني، ويتهرب مني في كل مرة أقوله على مشكلة في التقويم، ياريت محدش يروح للدكتور ده وربنا يعوض عليا وأنا هتعالج عند دكتور تاني إن شاء الله.
