كان هيموتني من الضرب ومدمن مخدرات.. فتاة تستغيث من مغني راب تعدى عليها بالضرب
تحدثت فتاة تدعى ميار مختار، في لايف عبر القاهرة 24 عن تعرضها للاعتداء على يد رابر شهير بالراب سين خلال عملها معه.
فتاة تستغيث من مغني راب تعدى عليها بالضرب
أشارت ميار مختار إلى تفاصيل تعرضها لاعتداء على يد رابر معروف في الراب سين قائلة: أنا اتعرضت للضرب اللي كان هيؤدي لموتي على يد رابر شهير، والشخص ده عمل كده وإحنا بنشتغل، عشان ظنوا إني هفتح ستوري هتكلم فيه عنه، وده مش حقيقي.
وأضافت: وأنا كنت بحاول جاهدة أقوله وقف الضرب، وهو مكنش بيوقف الضرب، وبعدها كلمني تاني بحجة أنه عاوزني اشتغل معاه تاني، وعمل نفسه إنه مكنش واعي وهو بيضربني، بس هو بعد ما ضربني خد تليفوني عشان يخرجني من كل حساباته بحكم شغلنا مع بعض.
وتطرقت ميار مختار، إلى مواقف اعتداءات متكررة متعلقة بهذا الشخص قائلة: بعد ما ضربني ورجع لبيته اعتدى على رجل مسن بدون مبرر، عشان تهيأ له حاجات بسبب إدمانه للشادو والبودر، وقبل الراجل ده ضرب أيضًا البنت اللي مرتبط بيها وهما شاغلين في الاستوديو اللي فوق بيته، وبعد ما اتكلمت عن موضوع تعرضي للضرب من الرابر، تواصلت البنت معايا وبعتتلي صور بتظهر تعرضها للضرب منه.
وبالنسبة لتأثير تلك الواقعة عليها فقالت ميار، الموقف ده حسسني بخوف غير طبيعي، لأن أول مرة أحس إني ممكن اتقتل، وكمان من شخص مفروض أعرفه وساعدته، وبعد الموقف ده مكنتش عارفه أنزل من البيت، ولما كنت بحاول أنزل الشارع كنت بخاف جدا من الناس، حاسه إني ممكن أي حد ممكن يأذيني.
