الأمن يفحص ادعاء سيدة بمحاولة تخديرها ونجلها داخل ميكروباص بشبرا الخيمة
تفحص الأجهزة الأمنية بوزارة الداخلية، ما تم نشره عبر أحد الحسابات الشخصية، لسيدة تزعم تعرضها لمحاولها تخديرها ونجلها، أثناء استقلالهما سيارة ميكروباص متجهة للطريق الدائري بالقليوبية.
سيدة تدعي محاولة تخدريها بمكيروباص شبرا الخيمة
وقالت «هبة الله» عبر صفحتها الشخصية على فيسبوك: النهارده اتعرضت لأسوء موقف عدى عليا في حياتي، كنت نازلة من عند ماما من طريق القناطر الخيرية في عربية المؤسسة طريق الدائري، وركبت العربية أنا وابني، والست اللي في الصورة دي الوحيدة في كل العربية طلبت تاخد مني تيم ابني، وأنا في الطبيعي برفض المساعدة دي حتى لو معايا شنطة أو حاجة اللي هو عندي أقع بس محدش ياخده مني بصراحه مش بطمن.
وأضافت: المهم ركبت وطلبت مني بإلحاح غريب اقعد جمبها وارجع ورا ومصممه أكثر من 5 مرات تعالي هنا جنبي وتشد مني الشنطة طيب هاتي الولد وأنا برفض، أنا كنت ماسكة 2 فون في أيدي قالتلي بتطفل غريب شيلي الموبيلات في الشنطة علشان لو وقعوا مش هتلاقيهم، مردتش ع كلامها المهم في نص الطريق اللي جنبي نزل قامت هي بسرعه غريبه قعدت جمبي، وفضلت تسألني ليه الولد بيعيط مردتش، سألتني تاني قولت تعبان هنا بقى أغرب رد فعل شفته، طلعت ببرونه من شنطتها وطلبت تاخده يشربها، طبعا رفضت بشدة، بعد شويه طلعت من شنطتها عبوه اسبراي صغيره قالتلي بصي المسك ده من عند الرسول، زقيت إيديها بشنطتي جامد قلتلها أنا عندي حساسية ومش بشم مسك أنا.
وأكملت: هي معاها إزازة مياه 2 لتر وماسكه كتلة مناديل فوقيها طلبت مني اشرب وقالتلي مالك مخضوضة كده، قلتلها مش مخضوضه ومش محتاجه مساعدتك ومن فضلك متتكلميش معايا، وهنا عليت صوتي وشخص ورا سمعني وسأل في حاجة، أنا كررت كل اللي هي قالته أنا في اللحظه دي كنت حرفيا مش جوايا نقطه دم ربنا يعلم وحاضنة ابني وبدعي من كل قلبي إنه يحفظه لأني ماليش غيره في الوقت ده، وطلعت فوني وصورتها وواضح جدا هي بتبصلي ازاي بنظرات جانبيه.
واختتمت: أنا لما حكيت للشخص اللي ورايا هي في لحظه نزلت من العربية، والغريبة كان معاها شاب وواحدة تانيه قدامنا مع كل كلامها معايا هي متكلمتش معاهم للحظة، ولا باين إن كان معاها حد، حسبي الله ونعم الوكيل من كل قلبي على كل لحظه رعب عشتها بسببها، أنا ربنا كان معايا أنا وابني لآخر لحظة، والحمد لله ستره حفظنا بحفظه.
