ناهد السباعي عن وفاة والدتها: كنت مسافرة.. وربنا رحمني من اللحظة الصعبة دي
تحدثت الفنانة ناهد السباعي، عن وفاة والدتها المنتجة الراحلة ناهد فريد شوقي، مشيرة إلى أنها كانت خارج مصر وقت الوفاة.
وقالت ناهد السباعي خلال تصريحات تليفزيونية: أمي كانت تعبانة واتوفت وأنا كنت في لبنان بصور مسلسل نقطة سودة، ومريم الخشت اللي بلغتني الخبر وكنت متضايقة إني مش عارفة أعيط ومش قادرة أنزلها مصر في ساعتها، بس ربنا رحمني من صعوبة اللحظة، ارتاحت وكانت بتقولي أنا عايزة أمشي خلاص.
وتابعت ناهد السباعي: كنت فاكرة إني هصوت وأدبدب في الأرض بس اكتشفت إني بقيت أعمل ده لما أروح أماكن لوحدي، كنت بروحها معاها قبل كدة، وقبل ما تتوفى كنت بقعد أعيط قدامها وتقولي إنتي اللي بتقويني.
وأضافت ناهد السباعي: مبقتش بهتم آكل، وبكلمها وبحس بروحانيتها لما بقرب من ربنا وبحس إن هي حواليا وعايزة تقولي حاجة.
ناهد السباعي تتحدث عن دورها في مسلسل نقطة سودة
وسبق وتحدثت ناهد السباعي، عن دورها الأخير في مسلسل نقطة سودة، كاشفة كيف استحضرت مشاعر كره الفتاة لوالدتها.
وقالت ناهد السباعي في تصريحات لـ القاهرة 24: استوحيت مشاعر البنت اللي بتكره مامتها بسبب أفعالها اللي كانت بتعملها فيها والتراكمات دي كلها خلتها تحس بكدة، ولسه هيحصل أحداث بس مش عايزة أحرقها.
