مصرية في الخارج تستغيث من زوجها: استولى على عربية ابني المريض ومانعني من رؤيته
استغاثت سيدة مصرية مقيمة خارج مصر، من زوجها، بزعم أنه استولى على سيارة ابنها المريض، ويمنعها من رؤيته.
وقالت أميرة المهدي، مصرية مقيمة خارج مصر، في منشور لها عبر حسابها على فيسبوك: ابني من ذوي الهمم وطلع له جواب يشتري سيارة معفية من الجمارك، واشتريت سيارة من شغلي وتعبي، وقررت أنزلها مصر بس والده كان عاوز يبيع الجواب بأعلي سعر لأن السيارة مش فارقة معاه، رغم أن حالة ابني الصحية لازم يكون عنده سيارة.
وأضافت المهدي: ضحيت وقررت اشتري جواب ابني من أبوه، وداينت نفسي واشتريته زي أي حد غريب ما بيشتري، ونزلت السيارة واقفة في الجمرك بسبب قرارات الجمارك، ولما الجمارك فتحت قرر باباه ياخدها، ويقولي دي حقي وهاخدها، لأني معنديش ولاية علي ابني، وهيضيع حقي بمنتهي السهولة.
سيدة تستغيث من طليقها
وواصلت أميرة المهدي: المشكلة إنه رافع عليا قواضي كيدية كثيرة ورافع عليا طاعة وخايفة أنزل أتمنع من السفر، أنا محتاجة أي حد في وزارة المالية أو الجمارك أو أي مكان، وعندي كل ما يثبت أن الطفل ابني وإن أنا اللي اشتريت السيارة، ومعايا التحويل البنكي ومعايا كشف حساب، أنا أول مرة أطلب دعمكم وأن صوتي يوصل وأقدر آخد حقي منه، لأن دي سيارة ابني وأنا اللي شارياها له، وده للأسف هياخدها يبيعها زي ما كان هيبيع الجواب وزي ما باعه ليا.
واستطردت أميرة المهدي: أنا صبرت علي الشخص ده سنين طويلة استغلال وسرقة وعايش على شقايا بس أنا تعبت خلاص ومعدتش قادرة أواجه لوحدي، والشخص الوحيد اللي كان بيجيب لي حقي منه أخويا الله يرحمه، أنا مديونة بتمن السيارة دي، وتمن الجواب اللي أخده مني وبسدد فيها هنا، وبربي بناتي وبشتغل على آخري، الصبح دوام رسمي وبالليل دروس، عشان أقدر أوفي.
واختتمت: بتحايل عليه يديني الولد، وحتي لو المقابل السيارة، رافض عشان هو وسيلة الضغط عليا به، ويقولي انزلي وخديه، عشان يأذيني ويأذي أولادي وخايفة ومش عارفة مكانه فين ولا بشوفه ولا عارفة صحته ايه وقايل لصاحبتي إنه سايبه في دار رعاية، ولما كان معاه كان بيسيبه في البيت لوحده بالساعات، وده طفل لا بيعرف يشرب نفسه ولا ياكل نفسه، ولا حتي يدخل الحمام لوحده ولا حتى بيقدر يتكلم، أنا حتى مش عارفة إيه المؤسسات اللي ممكن تساعدني وتقف جنبي.
