اسمها ابتسام.. إحدى أقرباء فتاة الفستان الأبيض: أبوها وجوزها السابق كانوا بيعذبوها وخطيبها مات من 8 شهور
تصدر اسم فتاة من الزقازيق، تُدعى ابتسام تريند مواقع التواصل الاجتماعي خلال الأيام الماضية، بعد ظهورها تغني أمام أحد محلات فساتين الزفاف بـ شارع الغشام، ليتضح أنها تعاني من صدمة نفسية طوال سنوات حياتها منذ الصغر، لكنها تفاقمت بـ وفاة خطيبها إذ قتل بـ طلق ناري عن طريق الخطأ قبل 8 أشهر.
وقالت زوجة خال ابتسام، وتُدعى نوال في تصريحات خاصة لـ القاهرة 24: ابتسام دلوقتي عندها 38 سنة واسمها ابتسام مش فاطمة خالص زي ما الناس بتقول، من زمان وهي بتعاني من حالة نفسية، بس زادت بسبب اللي حصلها في حياتها وشافته، ووالدها من وهي صغيرة كان بيعذبها ويضربها كتير، وسابت المدرسة من سنة رابعة ابتدائي ومكملتش تعليمها.
إحدى أفراد عائلة فتاة الفستان الأبيض تكشف حقيقة ماتم تداوله
وأضافت: ابتسام مشافتش الفيديو اللي انتشر وبقى تريند ليها وهي بتغني قدام الفستان، كمان بتحب تسمع الأغاني جدًا وكانت قبل ماتدخل المستشفى كل يوم بتنزل بالليل تلف في الشوارع وتقف تغني قدام المحلات.
وتابعت: ابتسام شافت في حياتها كتير واتعذبت بسبب ضرب أبوها ليها وتعنيفه الشديد، وزمان اتجوزت واحد وهو كمان عذبها وضربها، لدرجة إنه كان بيخليها تقعد في حظيرة البهايم، وبعدها اتخطبت لشاب بس اتقتل بسبب طلق ناري.
وأكملت: من زمان وكانت الناس عندنا هنا في الزقازيق كتير بتعطف عليها وكمان في الأعياد أو رمضان كله كان بيقف جنبها، ويساعدها لأن ظروفها هي وأهلها صعبة جدًا، ولكن مش صحيح إنها مشردة أو كانت عايشة في الشوارع زي ما اتقال لأ، هي ظروفها صعبة لكن مكانتشِ مرمية في الشارع وكل الكلام اللي بيتقال إنها مشردة غير صحيح إطلاقًا ونفسي الناس تفهم ده، وعمرها ما دخلت دور رعاية في حياتها وكل اللي بيتنشر على السوشيال ميديا غير سليم.
