مندوب شحن من الصم والبكم يثير تعاطف مستخدمي السوشيال ميديا.. وزوجته: سماعاته بايظة وميقدرش يركب اسكوتر
تداول رواد وسائل التواصل الاجتماعي منشورا كتبته مستخدمة تروي تجربتها مع أحد مندوبين الشحن، أثار تعاطف الكثيرين، حيث أشارت إلى أنها لجأت لشركة شحن لاستلام أوردر، وجاء المندوب ولكنها انتظرته لفترة طويلة، وظلت تهاتفه ولكن لم يأتها أي رد، لتفاجئ برسالة منه كتب فيها: معلش ممكن حضرتك تكتبي، سمعي ضعيف، واتضح أنه متواجد أمام منزلها من فترة ولكنه كان يشعر بالإحراج ومتردد في إرسال تلك الرسالة.
مندوب شحن من الصم والبكم يثير تعاطف مستخدمي السوشيال ميديا
شعرت الفتاة صاحبة المنشور بالتعاطف الشديد مع مندوب الشحن وحاولت إيصال عبرة من الأمر لمتابعيها، بأن يحاولوا ضبط أنفسهم في تلك المواقف لأن تسرعها كان من الممكن أن يتسبب في ألم كبير دون قصد منها، كما طالبت الناس بتقديم يد المساعدة لمندوب الشحن ومحاولة مساعدته ماديا، وتهافتت التعليقات التي تريد مد يد المساعدة على المنشور.
وتواصل القاهرة 24، مع زوجة مندوب الشحن، محمد حسين إبراهيم، 39 عاما، ولديه حالة ضعف في السمع منذ أن كان عمره 3 سنوات، يرتدي سماعتين في كلا الأذنين ولكن إحداهما توقفت عن العمل والأخرى ضعيفة للغاية، كما أن زوجته لديها شلل أطفال وترتدي جهاز تعويضي.
وأوضحت الزوجة، أنه خريج تجارة ويعمل مندوب للشحن منذ 4 أشهر، وقالت: كان شغال في مخزن، لكن سابه عشان مكنش قادر، بعد ما وقع على ضهره بضاعة تقيلة من اللي كان بيشيله، للأسف ما بنلاقيش شغل كتير متاح.
وأضافت: موضوع الدليفري ده بدأ يتعامل فيه شوية، ولكن لما مش بيعرف يتكلم بيديني الرقم وأنا اتعامل، هو بيسمع بسيط جدا لكن لو الشخص قدامه عشان يقرا شفايفه، وسماعته دلوقتي واحدة بايظة والتانية ضعيفة جدا، واحنا مش قادرين نجيب سماعة.
وأوضحت أنه يوصل الأوردرات عن طريق المواصلات العامة لأنه لا يمتلك اسكوتر أو موتوسيكل، والناس كتر خيرها نزلوا البوست ده وعايزين يجمعوا عشان يجبوله سماعة، واقترحوا موضوع الاسكوتر اللي بتلت عجلات، لأنه ميقدرش يركب الأسكوتر اللي بعجلتين عشان مشكلة ودانه مأثرة على التوازن.
