أبرز تصريحات علاء مرسي: عمري ما خدت مليون جنيه.. ونفسي أعمل فيلم رومانسي وأبوس في السينما
حل الفنان علاء مرسي، ضيفًا على أحد البرامج التليفزيونية، وتحدث خلال اللقاء عن تفاصيل مشواره الفني وكشف عن رأيه في بعض تصريحات الفنانين، بجانب الحديث عن تقبيله يد الفنان محمد هنيدي.
أبرز تصريحات علاء مرسي
- أتمنى أنول الشرف وأزور مقام الإمام علي عليه السلام، وأتمنى أن محبتنا له تكون موجودة بالقدر المطلوب، هو أبو الحسن والحسين وابن عم الرسول، وهو القدرة والشهامة وهو رقيق القلب والقوة والسلطة العدل، إحنا بنتكلم على عظيم من عظماء البشر اللي ربنا خلقهم علشان يصبح لينا قائد وإمام.
- أخالف رأي رانيا يوسف، وأنا رأيي أن الحجاب فرض وهذا هو ما علموه لنا مشايخنا وأهلنا، وفكرة أني أقول أنه مش فرض مش أنا اللي أقول، لأن في أزهر وعلماء هما اللي يقننوا وهما قالوا إنه فرض، يمكن في خلاف على النقاب، وإنما الحشمة والعفة فرض.
- كان عندي ورم بسيط في القولون وكان عندي اشتباه سرطان، وأنا دلوقتي في كامل الصحة والعافية الحمد لله، ولكن الإجهاد الكتير لأني عندي زي فرط الحركة وبنزل أشتغل وممكن ده صحيًا بيضغط مع العمر.
- نادية الجندي نجمة كبيرة جدًا، وأنا لا أتراجع عن تصريحاتي لأن الناس هاجمت رأيي، ودكتور أشرف زكي قالي إن التصريح ده خاطئ مني لأنه جرحها، وهي نجمة كانت تحتاج إلى أعمال أهم من اللي هي عملته، لما تبقى نجم لازم يبقى عليك مسؤولية أضخم وأكبر.
- موهبة نبيلة عبيد تتفوق على اختيارات نادية الجندي.
- أحمد حلمي من أهم النجوم الموجودة في الوطن العربي، ولكن عندي مشكلة في اختياراته، لأن الأطفال بتحبه هو مطلوب منه يبحث عن نص جيد للطفل، وطلبت منه ده على المستوى الشخصي لما قابلته لأنه في المنطقة دي مفيش أعلى منه.
- مفيش حد أفضل من عادل إمام، وهو لا يٌقارن وهو فوق التقييم، وأنا ظلمت نفسي بـ اختيارات غلط، وأنا نجم أوحد في حتتي لا أحد ينافسني فيها، أنا صاحب اللقطة الصادقة وسنيد مهم وقوي، وبحلم بالبطولة المطلقة.
- في فترة جالي حالة إحباط وأني مش عايز أكمل في الفن، وفي نفس الوقت جاتلي حالة صوفية ودورت على تأشيرة للمدينة المنورة وده كان صعب لأن باسبوري مكتوب فيه ممثل، وصديقي عملي تأشيرة عامل نظافة في المسجد النبوي، ولكني مشتغلتش عامل نظافة.
- طبعًا مشتغلتش ولكن كان ليا الشرف أني قعدت سنة كاملة في المسجد النبوي بجوار الحبيب عليه الصلاة والسلام ربنا يجمعنا تاني، وكان ليا مرتب شهري ولكني كنت بتبرع بيه، والفكرة كانت في المسمى اللي مكتوب في التأشيرة.
- الناس قالت أني بوست إيد محمد هنيدي علشان يشغلني، وأنا بوست إيده عشان هو صاحبي وأخويا، وأنا راجل صوفي واتربينا من مشايخنا على تقبيل الإيد والرأس، ولو أحمد السقا كان موجود كنت بوست إيده، وأنا بوست دماغه.
- هما مصوروش ليه وأنا ببوس إيد صلاح عبدالله؟، صلاح عبدالله أخويا الكبير ولما بشوفه بحس أني مش عارف أعمل له إيه، أنا مش عايز منهم حاجة وأنا لا أنشد أحد في من أجل المصلحة.
- أنا لا أؤمن بالثورات، أنا أؤمن بالدعاء للحاكم حتى لو ظالم، وده رأي الدين، ومفيش حاجة اسمها أنا سُني، الصحابة وآل البيت مكانوش سُنيين ومكانوش بيقولوا إحنا سُنيين، هما كانوا تابعين، ويُقال أهل السنة والجماعة.
- أنا بحب جلالة الملك فاروق ولكني لا أصلح لأمثل هذه الشخصية، وبحب الراحل أنور السادات فنيًا وأحمد زكي شخص الشخصية خارجيًا وملامح من الداخل.
- مقولتش إن هنيدي حرمني من البطولة المطلقة، أنا قلت إن زمان كنت بعمل فيلم والمنتج خد الفيلم وإداه لـ هنيدي من ورايا وهنيدي رفض لما عرف أن الفيلم بتاعي وفعلًا مشتغلوش، وأنا انفعلت جدًا وكنت متهور ورحت كسرت المسرح في الزمالك.
- نفسي أعمل فيلم رومانسي وأبوس في السينما، الناس هتقول إيه الراجل اللي كبر وخرف ده، ونفسي أمثل مع منة شلبي ولكنها مش هتحبني في الرومانسي.
- أنا عندي أدوار تراجيدي أكتر من الكوميدي ولكن الطاغي كوميدي.
- عمري ما خدت أجر في عمل مليون جنيه، لأني مش النجم اللي بيتباع.
