عندك 10 سراير وبيدخلك 1000 عيان.. منشور لـ طبيب قسم طوارئ بمستشفى جامعي يثير تعاطف مواقع التواصل
تصدر منشور لـ أحد الأطباء، تريند مواقع التواصل الاجتماعي خلال الساعات الماضية، إذ تحدث فيه الطبيب عن الظروف التي تمرُّ بها أقسام الطوارئ المستشفيات الجامعية، من مرضى وأطباء والإمكانات العلاجية، والضغط النفسي والجسدي الذي يعيشه أطباء المستشفيات الجامعية.
شارك طبيب يُدعى إبراهيم عادل، منشورًا عبر حسابه الرسمي بمنصة فيسبوك للتواصل الاجتماعي، والذي كتب فيه: نفسي أشرح للناس يعنى ايه طوارئ مستشفى جامعة، إيه إحساسك وأنت بتشتغل هناك، يعنى معاك مساحة ضيقة، هديلك 10 سراير وهيدخلك 1000 عيان.
وأضاف: كل عيان هيدخلك بيجري بيصوت وهو بيقول ابني بيموت!! حتى لو مش بيموت، حتى لو بس عنده إسهال، ابنه تعبان ومش لاقي حد غيرك، عاوزك تتشقلب أول ما تشوفه، تجري معاه وتتخض معاه، وإلا تبقى دكتور بارد معندكش رحمة.
منشور لـ طبيب قسم طوارئ يثير التعاطف
وأردف الدكتور في منشوره: أنت معاك على الـ 10 سراير: واحد في غيبوبة تامة، وواحد محتاج تنفس صناعي ورئته فشلت، ومفيش جهاز تنفس صناعي في الطوارئ، أنت بتدور لهم على مكان للرعية بالتليفون بس مفيش أماكن، جبت دكتور امتياز صغير قعدته جب العيان طول اليوم يدوس على بالونة منفوخة كأنها جهاز تنفس للعيان، على بال ما نتصرفله في رعاية.
وأوضح الدكتور: موبايلك مش بيبطل رن ومكالمات، جايلك عيان من الصعيد بالإسعاف، أول ما ييجي هتعمله كذا وكذا، ده هيدخل بسرعة متنساش، أنت مستنيه خليه في دماغك، العيانين شايفينك ماسك التليفون وفاتح واتساب وأنت مش مهتم؟ ناس هتشتمك وناس هتحاول تضربك.
وأكمل طبيب قسم الطوارئ: أسئلة وجودية بيتسئلها كل اللي في الطوارئ، مستشفى كبيرة عريضة زي دي مفيهاش مكان رعاية؟! يعنى إيه مفيش حضانة؟ فين السرير اللي هنقعد عليه؟ أقعد فين لحد ما نتيجة التحاليل ما تظهر؟ في الأول بترد على كل سؤال، لا مفيش أماكن رعاية فعلا، والعدد للأسف بيكون كبير، لا مفيش حضانات، مفيش سرير متاح وابنك مش محتاج سرير، ده شارب حشيش وهيفوق مع الوقت، أيوة هتقعد برة مستني التحاليل، مفيش حاجة اسمها تاخد سرير من العشرة عشان تستني تحليل، إحنا بنحط اللي محتاج بس على سرير، مفيش أماكن!
واختتم: كل ثانية، الأهل بيزعقوا ربنا ينتقم منكم فين الرحمة؟! الولد تعبان، بتفقد القدرة على الرد، وكمان بيجي عيان جاي من اليمن والسودان ونيجيريا ساعدونا الولد حالته سيئة، لغتنا مختلفة إحنا مش فاهمين بعض، مش عارفة أفهم تاريخ العيان المرضى؟ فين الورق بتاعته؟ مش معانا، قالوا أنتم شاطرين هتشخصوه، عالجوه.
