أحدهم جرحه في وجهه ورقبته.. ولي أمر طالب: زمايل ابني بيتنمروا عليه وبيضايقوه عشان وسيم
وقعت مشاجرة بين طالب وزميله، داخل احدى المدارس، أسفرت عن إصابة عبد الله.هـ، الطالب بالصف الأول الإعدادي، بعد أن انهال عليه زميله بالضرب، مستخدما قطعة زجاجة، حيث تعرض للتنمر وحاول الدفاع عن نفسه لكنه أصيب بجرح استلزم خياطته بـ 27 غرزة -حسب حديث والدة-.
إصابة طالب في مشاجرة والتنمر عليه داخل إحدى المدارس
وقال والد الطالب المصاب في تصريحات خاصة للقاهرة 24، إن ابنه طالب في الصف الأول الإعدادي، ومنذ أن انتقل من محافظة المنوفية، وبدأ دراسته في إحدى المدارس بسفاجا وهو يتعرض للتنمر بسبب وسامته، متابعا: كل ما يشوفوا ابني يقولوله وشك حلو ووسيم، ويقعدوا يتنمروا عليه، وابني كان بيسكت عشان مش عايز يعمل مشاكل.
وأضاف أن نجله توجه إلى المدرسة قبل الامتحان بنصف ساعة، وجلس يراجع مع زميله، لكن فوجئ بأحد الطلاب يجلس بجانبهم ويدخن سجائر الفيب، وعندما طلب منه أن يجلس بعيدا عنهم لمعاناته من الحساسية رفض، ونشبت مشاجرة بينهما وتصالحا، لكن الطالب المتهم بالاعتداء على نجله أراد الانتقام من نجله، حيث أحضر قطعة زجاج أمام باب المدرسة وتعدى عليه بجروح في الوجه واليد والرقبة، وقاله هزعل أمك عليك.
وتابع الأب وهو يبكي: مدير المدرسة كلمني قالي الحق ابنك اتعور في وشه، وأنا هنا مليش أقارب، ورحت على المستشفى وفضلت أعيط، وتم التحفظ على الطالب المعتدي على ابني، فسألت في المستشفى وطلبت خيط تجميل ملقتش، وخدت ابني على مستشفى خاصة، وخيطوا ابني، والدكتور بيبص على الجرح الخلفي، قالي قول الحمد لله ابنك كان ميت.
وأكمل الأب: والد المتهم جالي، وأول ما شاف ابنه بكى، وقالي متعملش محضر وأنا قلتله مش وقته، وعايز أطمن على ابني، ولسه المحضر مكانش خد رقم واتكلم معايا علشان نتفاوض، وهددني إنه هيعمل محضر، وانسحبت منهم واتعرضت على النيابة وشرحت وحكيت اللي حصل، وكل لما أشوف صورة ابني أبكي وقلت مش هتصالح.
وتابع: لما سألوا الولد المتهم أمام جهات التحقيق كان بيكدب، وقاله عبد الله كان جايب إزازة وضربني في إيدي، وأنا بعمل في إيدي كده جات في وشه، وابتدى يقوله كنت بدافع عن نفسي، وابني من ساعة ما جه المدرسة بيتنمروا عليه، وبيقولوله أنت وشك وسيم، واتقبض على الواد وأخلوا سبيله، وحاولت استشهد ببعض زمايل عبد الله، قالولي والد الطالب المتهم عدى علينا، وأبوه بيقول أنا معايا شهود كتير، يعني كده العيب عند ابني!، وطلبت من زمايله يشهدوا بس هما خايفين، ولفوا على أولياء الأمور وأنا عايز حق ابني اللي كان هيموت بسبب التنمر، وعملت محضر رقم 268 لسنة 2025 جنح قسم سفاجا.
