علي الطيب لأسرة مسلسل عمر أفندي: نسبوا نجاح جُملتي ليهم.. وفيه أصول للمهنة
علق الفنان علي الطيب، على رسالته التي وجهها لأسرة مسلسل عمر أفندي، حول استعانتهم بإحدى جُمله في مسلسله أهو ده اللي صار.
وقال علي الطيب خلال تصريحاته لـ القاهرة 24: صحابي اللي ماسكين الصفحة عندي على فيسبوك كانوا عايزين يكتبوا ده من بدري وأنا كنت رافض، لكن استغربوا إن باقي الصفحات عمالة تنسب الجملة لـ عمر أفندي فكانوا عايزين يوضحوا.
وأضاف علي الطيب حديثه: أنا معنديش مشكلة، والجملة دي مش أنا اللي اخترعتها، لكن محدش كان يعرف يعني إيه حاجة 13 خالص، وأي ممثل بيجتهد علشان يطلع حاجة من الشخصية أو لزمة وبتتحفر في ذهن الجمهور بيكون مجهود علشان يحصل.
وأردف علي الطيب: صفحات مسلسل عمر أفندي قعدت تقول إن محمد صلاح أو ليفربول استخدمت الجملة الأشهر في مسلسل عمر أفندي، طب الجملة دي مين اللي قالها قبليكم؟ محدش نسبها لصاحبها نسبوا نجاح الجملة ليهم هما، دول زمايلي ونجحوا وإحنا عارفين أصول المهنة، لو زميل ليا اعتذر عن عمل وأنا مترشح له بروح أكلمه أستأذنه الأول.. دي أصول.
علي الطيب يوجه رسالة لأسرة مسلسل عمر أفندي
وسبق ووجه علي الطيب رسالة لأسرة مسلسل عمر أفندي، الذي يلعب بطولته الفنان أحمد حاتم، وحقق نجاحًا كبيرًا في الفترة الأخيرة، حيث أشار الطيب إلى أن أسرة المسلسل استعانت بـ جملته الشهيرة حاجة 13 خالص، التي اشتهر بها في مسلسل أهو ده اللي صار، وكتب الطيب منشورًا، عبر حسابه بموقع فيس بوك، قال فيه: حابب أبارك لكل زمايلي في عمر أفندي على نجاحهم، بجملة وديع البساطي المشهورة دي حاجة 13 خالص، واستنوا على الجزء التاني لغاية ما أفكرلكم في الجديد منه عشان تعرفوا تقلدوه، تحياتي للي نجحوا بمصطلحاتي، وطول عمرها اللعبة ليها أصول وبنتعلم من بعض، مش بنعلم على بعض.
